Bugun, 9-avgust kuni Shavkat Mirziyoyev Ozarbayjon prezidenti Ilhom Aliyev bilan telefon orqali muloqot qildi. Bu haqda Prezident matbuot xizmati xabar berdi.
Maʼlum qilinishicha, O‘zbekiston rahbari Ozarbayjon yetakchisi va xalqini tarixiy voqea — kuni kecha Vashington shahrida Ozarbayjon va Armaniston o‘rtasida tinchlik deklaratsiyasi imzolangani bilan samimiy qutlagan.
Tez fursatda tinchlik bitimi rasman imzolanishi Janubiy Kavkazda tinchlik, barqarorlik va ravnaqni taʼminlashda muhim ahamiyat kasb etishiga ishonch bildirilgan.
Shu bilan birga, prezidentlar Shavkat Mirziyoyevning joriy yil iyulda Ozarbayjonga davlat tashrifi davomida erishilgan kelishuvlar masalasini muhokama qilgan. Jumladan, o‘zaro kelishuv doirasida ikki tomonlama strategik sheriklik va ittifoqchilik munosabatlarini yanada rivojlantirish va mustahkamlash muhimligi taʼkidlangan.
“Joriy yil boshidan tovar ayirboshlash 30 foizga oshdi. ‘Yo‘l xaritasi’ asosida iqtisodiyotning turli tarmoqlarida istiqbolli kooperatsiya loyihalari shakllantirilmoqda. Neft-gaz sohasidagi strategik loyiha bo‘yicha imzolangan Mahsulot taqsimotiga oid bitim doirasida amaliy ishlar olib borilmoqda”, deyiladi manbada.
Prezidentlar bo‘lajak oliy darajadagi uchrashuv va tadbirlar rejasini ham ko‘rib chiqqan.
Avvalroq Tashqi ishlar vazirligi O‘zbekiston Ozarbayjon—Armaniston tinchlik kelishuvini olqishlashini eʼlon qilgandi.
Maʼlumot uchun, qirq yillik mojarodan so‘ng Armaniston va Ozarbayjon rahbarlari Nikol Pashinyan va Ilhom Aliyev Vashingtonda AQSH prezidenti Donald Tramp ishtirokida tinchlik deklaratsiyasini imzoladi. Deklaratsiyada allaqachon kelishilgan tinchlik shartnomasini imzolash va ratifikatsiya qilish jarayonini tezlashtirish zarurligi taʼkidlangan. Deklaratsiyada mintaqada aloqalarni tiklash muhimligi va Ozarbayjonning asosiy hududi bilan uning eksklavi Naxichevan o‘rtasida Armaniston hududidan, uning Eron bilan chegarasi bo‘ylab o‘tadigan transport yo‘lagini yaratish masalasi ham ko‘tarilgan.
Izoh (0)