Yekaterinburgdagi “Ural” kompressor zavodi bosh direktori Denis Tasakov ishchilarga ish haqi to‘lanmasligini Ukrainadagi “maxsus operatsiya” sabab deb tushuntirdi. Bu haqda EAN xabar bermoqda.
“Men odamlar o‘z fikrlarini o‘zgartirishini istardim. Men hech kimdan kechirim so‘ramoqchi emasman, chunki hamma vaziyatni tushunishi kerak. Ulug‘ Vatan urushi davrida hech kim maosh haqida so‘ramagan, bizda davlat mudofaa buyurtmasi bor va u hozir xavf ostida. Odamlar (“maxsus operatsiya” ishtirokchilari) o‘lmoqda va bu, menimcha, muhimroq. Hozir hamma juda aqlli bo‘lib qoldi, bizda ish tashlashlar bor!”, — deya Tasakov jurnalistlarga intervyu bergan.
Bosh direktorning so‘zlariga ko‘ra, kombinat hali ham aprel va may oylari uchun maoshlarni qisman to‘lamagan. U 23-iyun kuni ishchilar aprel oyi uchun pul olishlarini, ish tashlamaganlarning maoshi to‘liq to‘lanishini va’da qildi. Jami 370 ishchidan 50 nafari ish tashlashlarda ishtirok etmoqda, degan Tasakov.
Boshqaruvchi to‘lovlarning kechikishini “Ural” kompressor zavodi hamkorlik qilgan ko‘plab korxonalar sanksiyalar ostida qolgani va “ularning maxsus hisob varaqlarida sanksiyaga tushgan banklarda pullari borligi” bilan izohladi. Bundan tashqari, Tasakovning so‘zlariga ko‘ra, zavoddagi vaziyatga valyuta kursi ham ta’sir qilgan.
“Mamlakat hozir qanday holatda ekani hech kimga sir emas — maxsus harbiy operatsiya”, — deydi u.
Izoh (0)