Kompaniyaning Rossiyadagi veb-saytida Nike mono-brend do‘konlari “boshqa ochilmasligi” haqida xabar paydo bo‘ldi. Kompaniya Rossiyada 1994-yildan beri faoliyat yuritayotgan bo‘lib, shu yilning mart oyi boshida mamlakatda onlayn savdoni to‘xtatgandi.
Amerikaning sport kiyimlari ishlab chiqaruvchisi Nike Rossiya bozoridan butunlay chiqib ketmoqda, deya xabar berdi Reuters kompaniya bayonotiga tayanib.
Kompaniya veb-saytining ruscha versiyasida shunday xabar e‘lon qilindi: “Nike Inc. Rossiya bozorini tark etishga qaror qildi. Shu bois, nike.com va Nike mobil ilovasi bu hududda endi ishlamaydi”. Shuningdek, vaqtincha yopilgan do‘konlar “qayta ochilmaydi”.
Mart oyi boshida Nike Rossiyadagi buyurtmalarni qabul qilishni to‘xtatdi. May oyi oxirida “Vedomosti” IRG franchayzi maktubiga tayanib, Amerika kompaniyasi u bilan shartnomani uzaytirmaganini haqida yozdi.
Zaxiradagi mahsulotlar tugagandan so‘ng, rus hamkori ushbu brend ostidagi barcha do‘konlarni yopadi. Franchayzi Rossiyada 36 ta do‘konga ega.
Izoh (0)