«Улуғ Ватан уруши йилларида ҳеч ким ойлик ҳақида сўрамаган». «Урал» заводи бош директори ишчиларга тўловлар кечиктирилишини «махсус операция» билан боғлади

Екатеринбургдаги «Урал» компрессор заводи бош директори Денис Тасаков ишчиларга иш ҳақи тўланмаслигини Украинадаги «махсус операция» сабаб деб тушунтирди. Бу ҳақда ЭАН хабар бермоқда.

«Мен одамлар ўз фикрларини ўзгартиришини истардим. Мен ҳеч кимдан кечирим сўрамоқчи эмасман, чунки ҳамма вазиятни тушуниши керак. Улуғ Ватан уруши даврида ҳеч ким маош ҳақида сўрамаган, бизда давлат мудофаа буюртмаси бор ва у ҳозир хавф остида. Одамлар («махсус операция» иштирокчилари) ўлмоқда ва бу, менимча, муҳимроқ. Ҳозир ҳамма жуда ақлли бўлиб қолди, бизда иш ташлашлар бор!», — дея Тасаков журналистларга интервью берган.

Бош директорнинг сўзларига кўра, комбинат ҳали ҳам апрель ва май ойлари учун маошларни қисман тўламаган. У 23 июнь куни ишчилар апрель ойи учун пул олишларини, иш ташламаганларнинг маоши тўлиқ тўланишини ваъда қилди. Жами 370 ишчидан 50 нафари иш ташлашларда иштирок этмоқда, деган Тасаков.

Бошқарувчи тўловларнинг кечикишини «Урал» компрессор заводи ҳамкорлик қилган кўплаб корхоналар санкциялар остида қолгани ва «уларнинг махсус ҳисоб варақларида санкцияга тушган банкларда пуллари борлиги» билан изоҳлади. Бундан ташқари, Тасаковнинг сўзларига кўра, заводдаги вазиятга валюта курси ҳам таъсир қилган.

«Мамлакат ҳозир қандай ҳолатда экани ҳеч кимга сир эмас — махсус ҳарбий операция», — дейди у.