AQSH sobiq prezidenti Donald Tramp amaldagi davlat rahbari Jo Bayden ma’muriyatining harakatlari jahon urushiga olib kelishi mumkinligini aytdi, deb yozadi Newsmax.
“Mamlakatimizni yana buyuk qilishimiz kerak. Ukraina va Rossiya bilan sodir bo‘layotgan voqealar tufayli biz jiddiy xavf ostidamiz. Ularning (AQSHning hozirgi ma’muriyati — tahr.) bu vaziyat bilan kurashish uchun tanlagan yo‘li jahon urushi bilan yakunlanishi mumkin. Ularning qilayotgan ishlari ahmoqona”, — dedi Tramp.
Siyosatchining so‘zlariga ko‘ra, hozir butun dunyoda Qo‘shma Shtatlarga “hurmat ko‘rsatilmayapti”, Xitoy esa jahonning super davlatiga aylanib bormoqda, Eron bo‘lsa tez orada yadroviy davlatga aylanadi. Tramp Qo‘shma Shtatlar retsessiyaga yuz tutayotganini qo‘shimcha qilib, iqtisodiy vaziyatni “katta falokat” deb atadi.
Shuningdek, sobiq prezidentning aytishicha, u 2024-yilda bo‘lib o‘tadigan prezidentlik sayloviga nomzod sifatida qatnashishiga xalal beradigan biror nimani ko‘rmayapdi.
Tramp avvalroq 2024-yilgi saylovlarda prezidentlikka nomzodini qo‘yishini tan olgan edi. Amaldagi davlat rahbari Jo Bayden ham ushbu saylovda ikkinchi muddatga nomzodini qo‘yish niyatida ekanini bildirgan.
Tramp AQSHdagi iqtisodiy vaziyat haqida ham gapirdi. Uning so‘zlariga ko‘ra, mamlakat iqtisodiyoti tanazzulga yuz tutmoqda. “Bu ikki yildan keyin sodir bo‘ladigan narsa emas. Biz tanazzuldamiz”, — deydi u.
Sobiq prezidentning fikricha, iqtisodiyotdagi muammolar neftdan voz kechish va yashil energiyaga o‘tishga urinishlar bilan bog‘liq. Tramp shu sababli yoqilg‘i narxi ko‘tarilgani va bu inflyatsiyaning oshishiga olib kelganini aytdi.
Izoh (0)