АҚШ собиқ президенти Дональд Трамп амалдаги давлат раҳбари Жо Байден маъмуриятининг ҳаракатлари жаҳон урушига олиб келиши мумкинлигини айтди, деб ёзади Newsmax.
«Мамлакатимизни яна буюк қилишимиз керак. Украина ва Россия билан содир бўлаётган воқеалар туфайли биз жиддий хавф остидамиз. Уларнинг (АҚШнинг ҳозирги маъмурияти — таҳр.) бу вазият билан курашиш учун танлаган йўли жаҳон уруши билан якунланиши мумкин. Уларнинг қилаётган ишлари аҳмоқона», — деди Трамп.
Сиёсатчининг сўзларига кўра, ҳозир бутун дунёда Қўшма Штатларга «ҳурмат кўрсатилмаяпти», Хитой эса жаҳоннинг супер давлатига айланиб бормоқда, Эрон бўлса тез орада ядровий давлатга айланади. Трамп Қўшма Штатлар рецессияга юз тутаётганини қўшимча қилиб, иқтисодий вазиятни «катта фалокат» деб атади.
Шунингдек, собиқ президентнинг айтишича, у 2024 йилда бўлиб ўтадиган президентлик сайловига номзод сифатида қатнашишига халал берадиган бирор нимани кўрмаяпди.
Трамп аввалроқ 2024 йилги сайловларда президентликка номзодини қўйишини тан олган эди. Амалдаги давлат раҳбари Жо Байден ҳам ушбу сайловда иккинчи муддатга номзодини қўйиш ниятида эканини билдирган.
Трамп АҚШдаги иқтисодий вазият ҳақида ҳам гапирди. Унинг сўзларига кўра, мамлакат иқтисодиёти таназзулга юз тутмоқда. «Бу икки йилдан кейин содир бўладиган нарса эмас. Биз таназзулдамиз», — дейди у.
Собиқ президентнинг фикрича, иқтисодиётдаги муаммолар нефтдан воз кечиш ва яшил энергияга ўтишга уринишлар билан боғлиқ. Трамп шу сабабли ёқилғи нархи кўтарилгани ва бу инфляциянинг ошишига олиб келганини айтди.
Изоҳ (0)