Turkmanistonning sobiq prezidenti Gurbanguli Berdimuhamedovning tavallud topgan kuni (29-iyun) munosabati bilan Ashxoboddagi Ikkinchi istirohat bog‘i o‘rnida barpo etilayotgan “Toshkent” bog‘i ochilishi rejalashtirilmoqda.
“Xronika Turkmenistana” nashri muxbirlarining xabar berishicha, hozirda bog‘dagi qurilish panjaralari olib tashlanyapti, yo‘llar yuvilyapti.
Bundan tashqari, oy oxirida mamlakatda butun bir hafta davomida Madaniyat va san’at xodimlari kuni hamda Maxtumquli Firog‘iy she’riyati kuni nishonlanadi. Bayram tadbirlari katta Berdimuhamedovning tavallud kuniga bag‘ishlangan katta konsert bilan yakunlanadi.
Gurbanguli Berdimuhamedov O‘zbekiston tashqi ishlar vaziri Abdulaziz Komilovning 2021-yil 17-fevral kuni Turkmanistonga tashrifi chog‘ida unga Ashxobod shahrida Toshkent bog‘i qurilishi haqida ma’lum qilgandi. Ertasi kuni “Neytral Turkmaniston” gazetasi bog‘ni loyihalash va qurish bo‘yicha tender e’lon qildi. Buyurtmachi Ashxobod shahri hokimligi edi.
2021-yilning 17-mart kuni Toshkent shahar hokimi Jahongir Ortiqxo‘jayev boshchiligidagi delegatsiya amaliy tashrif bilan Ashxobodda bo‘ldi va Ashxobod hokimi bilan uchrashuvda “Toshkent bog‘i”ning dastlabki loyihasi bilan tanishdi.
2017-yil oktabr oyida Toshkentda Ashxobod bog‘i ochilgan edi, unda favvora, sakkiz qirrali yulduz ko‘rinishidagi gulzorlar, shuningdek, arxitekturasi Ashxoboddagi xalqaro aeroportga taqlid qiluvchi amfiteatr barpo qilingan.
Izoh (0)