Yevropa Ittifoqi Qrim va Sevastopolga qarshi sanksiyalarni 2023-yilning 23-iyunigacha uzaytirdi. Bu haqda ittifoqning 20-iyun kuni chiqargan bayonotiga tayanib, “Korrespondent.net” xabar berdi.
“Bugun YI kengashi Rossiyaning Qrim va Sevastopolni noqonuniy anneksiya qilishi munosabati bilan joriy qilingan sanksiyalarni 2023-yil 23-iyuniga qadar uzaytirishga qaror qildi”, — deyiladi hujjatda.
Sanksiyalar orasida Qrim yoki Sevastopoldan Yevropa Ittifoqiga mahsulot olib kirishni, Qrim yoki Sevastopolga investitsiyalar kiritishni, Qrim yoki Sevastopolda turizm xizmatlarini ko‘rsatishni taqiqlash kiradi. Shuningdek, u Qrim kompaniyalari yoki Qrimdagi transport, telekommunikatsiya va energetika korxonalari uchun ayrim turdagi tovarlar va texnologiyalarni eksport qilishni, shuningdek, mintaqadagi neft, gaz va mineral resurslarni qidirish va qazib olishni taqiqlashni o‘z ichiga oladi.
Qaror Yevropa Ittifoqining rasmiy jurnalida chop etilganidan keyin kuchga kiradi.
Eslatib o‘tamiz, avvalroq Ukraina Yevropa Ittifoqiga Rossiyaga qarshi sanksiyalarning yettinchi paketi bo‘yicha takliflar kiritgan edi. Kiyev imkon qadar tezroq yangi cheklovlar qabul qilinishini talab qilmoqda.
Ukraina prezidenti ofisi ma’lumotlariga ko‘ra, Rossiyaga qarshi sanksiyalar rejasi yarmidan kamroq bajarilgan.
Izoh (0)