Moskva shahar sudi Meta’ning uni “ekstremistik tashkilot” deb e’tirof etgan va Rossiyadagi faoliyatini taqiqlagan quyi sud qarori ustidan bergan apellatsiyasini rad etdi.
“Apellyatsiya qanoatlantirilmaydi, Moskva Tverskoy sudining 2022-yil 21-martdagi qarori o‘zgarishsiz qoldi”, — deya sudya Aleksandr Ponomarev qarorni e’lon qildi. Bu haqda “Interfaks” nashri xabar berdi.
Shu tariqa, mamlakatda bloklangan Facebook va Instagram ijtimoiy tarmoqlariga egalik qiluvchi Meta kompaniyasining Rossiyadagi taqiqi qonuniy kuchga kirdi.
Sud majlisida so‘zga chiqqan Bosh prokuratura vakillari Meta bir necha bor ma’muriy javobgarlikka tortilgani va taqiq bo‘yicha da’vo arizasi tizimli ravishda sodir etilgan qoidabuzarliklar natijasi ekanligini ta’kidladi. “Meta rahbariyatining Rossiya fuqarolarini o‘ldirishga chaqirishga ruxsat berish haqidagi rasmiy pozitsiyasi e‘lon qilingandi” — degan prokuror.
Meta advokatlari, o‘z navbatida, kompaniya Rossiya fuqarolik sudlarining yurisdiksiyasiga kirmaganligi sababli sud jarayonining o‘zini noqonuniy deb hisoblashlarini yana bir bor ta‘kidladi. Meta — xorijiy yuridik shaxs bo‘lib, Rossiyada vakolatxonalari yo‘q, deya eslatgan ular.
Izoh (0)