“Siz mening qahramonimsiz!” Ukrainaga kelgan aktyor Ben Stiller Vladimir Zelenskiy bilan ko‘rishdi (video)

Ukrainaga amerikalik aktyor va BMT yaxshi niyat elchisi Ben Stiller keldi, deb xabar bermoqda Meduza.

Dastlab u Polshada ukrainalik qochqinlar bilan uchrashdi, so‘ng Lvovga va Kiyev viloyati shaharlariga tashrif buyurdi. U yerda u video tasvirga olib, “Urush va zo‘ravonlik butun dunyoda insonlar hayotini vayron qilmoqda. Hech kim o‘z uyini tark etishni xohlamaydi. Xavfsizlikda bo‘lish — hamma foydalana olishi kerak bo‘lgan huquqdir”, — deya ta’kidladi.

Keyinroq Stiller Kiyevga kelib, Ukraina prezidenti Vladimir Zelenskiy bilan uchrashuv o‘tkazdi. Zelenskiyga murojaat qilar ekan, aktyor uni o‘zining qahramoni deb atadi. “Bu men uchun katta sharaf… Siz mening qahramonimsiz!” — dedi u.

“Siz qilgan ish, mamlakatni, dunyoni jipslashtirganingiz haqiqatda odamni ruhlantiradi”, — deya qo‘shib qo‘ydi Stiller.

“Bu vayronagarchiliklarni televizor orqali yoki ijtimoiy tarmoqlarda ko‘rish boshqa. Bularning barchasini o‘z ko‘zlari bilan ko‘rish — boshqa narsa. Bunaqasi ancha kuchliroq ta’sir qiladi”, — dedi aktyor.