Germaniya kansleri Olaf Shols Rossiya prezidenti Vladimir Putin o‘z mamlakatiga “demokratiya uchqunlari” tarqalishidan qo‘rqishini aytdi, deb yozadi “RBK”.
“Putin, aftidan, demokratiya uchquni Rossiyaga ham sachrab kirishidan qo‘rqadi. Mana shuning uchun u ko‘p yillar mobaynida NATO va Yevroittifoqning parchalanishiga qaratilgan siyosatni olib bordi”, — deb yozdi u Twitter’da.
Kanslerning fikricha, Rossiya yetakchisi ta’sir hududlari siyosatiga qaytmoqchi. “Ammo u bunga erisholmaydi”, — deya qo‘shib qo‘ydi u.
Rossiya Tashqi ishlar vazirligi vakili Mariya Zaxarova Sholsning gaplarini izohlab, Rossiyaga bir necha marta Germaniya uchqunlari kirib kelganini aytdi. “Yong‘inlarga boshqa yo‘l qo‘ymaymiz”, — deb ishontirdi u.
Putin 2021-yil sentabrida Sharqiy iqtisodiy forum chog‘ida G‘arb demokratiyani ilgari surish shiori ostida dunyoda o‘z ta’sirini saqlab qolishga intilayotganini aytgandi.
“Agar Demokratiya qaysidir xalqqa kerak bo‘lsa, xalq bunga o‘zi keladi. Buni majburlash usullari bilan qilish kerak emas”, — deb ta’kidlagandi u. Rossiya yetakchisi Afg‘oniston namunasi boshqa xalqlarni o‘z andozasi bo‘yicha “sivilizatsiyalashtirish”ga urinishlar mantiqsiz ekanini isbotlashi kerak edi, degandi.
Davlat rahbari o‘shanda sanksiyalarni boshqa mamlakatlarga o‘z qadriyatlarini zo‘rlab qabul qildirish siyosatining bir qismi deb atagandi.
“Demokratiyani import qilish” mumkin emasligi haqida Putin avval ham gapirgan. Xususan, 2017-yilda u Rossiyada tez orada xuddi AQSH, Fransiya yoki Germaniyadagidek tartiblar yuzaga kelishi imkonsiz, deb hisoblagandi. Davlat rahbari buni jamiyat asta-sekinlik bilan rivojlanishi kerakligi bilan izohlagandi.
Shu bilan birga, u demokratik va suveren mamlakat bo‘lgan Rossiyani shaytonlashtirmaslikka chaqirgandi. “Muayyan muammolar shu bilan bog‘liq, ammo katta afzalliklar ham shundadir”, — degan edi Putin.
2020-yilda Rossiya prezidenti haqiqiy demokratiya va fuqarolik jamiyati “xorijlik xayrixohlar faoliyatining mahsuli” bo‘la olmasligini ta’kidlagandi.
Izoh (0)