Германия канцлери Олаф Шольц Россия президенти Владимир Путин ўз мамлакатига «демократия учқунлари» тарқалишидан қўрқишини айтди, деб ёзади «РБК».
«Путин, афтидан, демократия учқуни Россияга ҳам сачраб киришидан қўрқади. Мана шунинг учун у кўп йиллар мобайнида НАТО ва Евроиттифоқнинг парчаланишига қаратилган сиёсатни олиб борди», — деб ёзди у Twitter’да.
Канцлернинг фикрича, Россия етакчиси таъсир ҳудудлари сиёсатига қайтмоқчи. «Аммо у бунга эришолмайди», — дея қўшиб қўйди у.
Россия Ташқи ишлар вазирлиги вакили Мария Захарова Шольцнинг гапларини изоҳлаб, Россияга бир неча марта Германия учқунлари кириб келганини айтди. «Ёнғинларга бошқа йўл қўймаймиз», — деб ишонтирди у.
Путин 2021 йил сентябрида Шарқий иқтисодий форум чоғида Ғарб демократияни илгари суриш шиори остида дунёда ўз таъсирини сақлаб қолишга интилаётганини айтганди.
«Агар Демократия қайсидир халққа керак бўлса, халқ бунга ўзи келади. Буни мажбурлаш усуллари билан қилиш керак эмас», — деб таъкидлаганди у. Россия етакчиси Афғонистон намунаси бошқа халқларни ўз андозаси бўйича «цивилизациялаштириш»га уринишлар мантиқсиз эканини исботлаши керак эди, деганди.
Давлат раҳбари ўшанда санкцияларни бошқа мамлакатларга ўз қадриятларини зўрлаб қабул қилдириш сиёсатининг бир қисми деб атаганди.
«Демократияни импорт қилиш» мумкин эмаслиги ҳақида Путин аввал ҳам гапирган. Хусусан, 2017 йилда у Россияда тез орада худди АҚШ, Франция ёки Германиядагидек тартиблар юзага келиши имконсиз, деб ҳисоблаганди. Давлат раҳбари буни жамият аста-секинлик билан ривожланиши кераклиги билан изоҳлаганди.
Шу билан бирга, у демократик ва суверен мамлакат бўлган Россияни шайтонлаштирмасликка чақирганди. «Муайян муаммолар шу билан боғлиқ, аммо катта афзалликлар ҳам шундадир», — деган эди Путин.
2020 йилда Россия президенти ҳақиқий демократия ва фуқаролик жамияти «хорижлик хайрихоҳлар фаолиятининг маҳсули» бўла олмаслигини таъкидлаганди.
Изоҳ (0)