Yevroittifoq Kengashining Lyuksemburgdagi yig‘ilishi ishtirokchilarining barchasi Ukrainaga ittifoqqa qo‘shilish uchun nomzod maqomini rasman taqdim etish qarorini qo‘llab-quvvatladi. Bu haqda Bloomberg o‘z manbalariga tayanib xabar berdi.
Agentlik ma’lumotlariga ko‘ra, ushbu qadam shu haftadayoq, 23—24-iyun kunlari bo‘lib o‘tadigan mamlakatlar yetakchilari sammitida amalga oshiriladi. Bundan tashqari, mamlakatlar Moldovaga hamda Gruziyaga ham nomzod maqomini berishga tayyor, ammo ular qo‘shimcha shartlarni bajarishi kerak.
Bloomberg manbalari xabar berishicha, Vengriya bosh vaziri Viktor Orban Bosniya va Gersegovinaga nomzod maqomini berishni so‘ragan, ammo Yevroittifoqning boshqa a’zolari taklifni “muammoli” deb hisoblagan.
17-iyun kuni Yevrokomissiya Ukrainaga Yevroittifoqqa a’zolik nomzodini taqdim etishni tavsiya qildi. Yevrokomissiya rahbari Ursula fon der Lyayyen mamlakat “Yevropa qadriyatlari va standartlariga munosib bo‘lishga intilish va qat’iyatini aniq-ravshan namoyish etganini” aytdi. Komissiya raisi qayd etishicha, Kiyev oligarxlarga qarshi qat’iy qonunlar qabul qilgan hamda Yevroittifoqning ozchiliklarga nisbatan islohotlar bo‘yicha tavsiyalarining 70 foizini bajargan.
Ukraina prezidenti Vladimir Zelenskiy Yevrokomissiyaga tavsiya uchun minnatdorlik bildirdi va bu Kiyevni “g‘alaba”ga yaqinlashtiruvchi, “Yevroittifoqqa a’zolik yo‘lidagi birinchi qadam” ekanini aytdi.
Yevrokomissiya xulosasiga ko‘ra, Ukraina oliy darajada korrupsiya bilan hamda oligarxlar bilan kurashishni kuchaytirishda, shuningdek, ozchiliklarga nisbatan qonunchiliklarni isloh qilishda davom etishi kerak bo‘ladi. Bundan tashqari, Kiyev Konstitutsiyaviy sud sudyalarini tanlab olish jarayoni haqida qonunlar qabul qilishi va Sudyalar oliy malaka komissiyasi tuzish uchun nomzodlar tanlab olishni yakunlashi kerak. Ushbu talablar bajarilmasa, nomzod maqomi qaytarib olinishi mumkin.
Ukraina Yevroittifoqqa qo‘shilish uchun arizani Rossiya harbiy operatsiyasi boshlanganidan keyin bergan edi. Ukraina masalasi bo‘yicha yakuniy qaror 23—24-iyun kunlari Bryusseldagi sammitda qabul qilinadi, barcha — 27 ta a’zo davlat ijobiy javob berishi kerak.
Mavzuga doir:
- Shols Yevroittifoq tarkibiga kirish qoidalarini soddalashtirishni taklif qildi
- Makron: “Fransiya, Germaniya, Italiya va Ruminiya Ukrainaga zudlik bilan YI a’zoligiga nomzod maqomi berilishini qo‘llab-quvvatlaydi”
- Gruziya hukumati Tbilisi Kiyevdan ko‘ra ko‘proq YI maqomini olishga munosib deb hisoblamoqda
Izoh (0)