Dushanba kuni Litva Tashqi ishlar vazirligi Rossiyaning mamlakatdagi muvaqqat ishlar vakili Sergey Ryabokonga Kaliningrad viloyati va Rossiyaning qolgan qismi o‘rtasida tranzit o‘tadigan po‘lat va qora metall mahsulotlariga Yevropa Ittifoqi (YI) sanksiyalari qo‘llanishini tushuntirib, nota yubordi, deya xabar beradi Litva TIV.
Uchrashuv chog‘ida Litva go‘yoki Kaliningrad viloyati va Rossiya o‘rtasidagi yuk tranzitini butunlay taqiqlagani haqidagi ma’lumot rad etildi, deyiladi vazirlik bayonotida.
“Yevropa Ittifoqining sanksiyalar rejimiga taalluqli bo‘lmagan yo‘lovchilar va yuklarni Litva hududi orqali Kaliningrad viloyatiga va undan Rossiyaga olib o‘tish davom etadi. Litva ushbu tranzitga hech qanday bir tomonlama, individual yoki qo‘shimcha cheklovlar kiritmagan. Litva turli o‘tish davrlari va amal qilish muddatlariga ega bo‘lgan Yevropa Ittifoqi sanksiyalarini izchil amalga oshirmoqda” deya qo‘shimcha qilinadi xabarda.
Tashqi ishlar vazirligi 2022-yil 15-martda qabul qilingan Yevropa Ittifoqining to‘rtinchi sanksiya to‘plamida Yevropa Ittifoqining Rossiya po‘lat va boshqa qora metall mahsulotlarining Yevropa Ittifoqiga importi va Yevropa Ittifoqi orqali tranzitiga nisbatan cheklovchi choralari nihoyat 17-iyundan kuchga kiritilgani haqida aytib o‘tgan.
Avvalroq, dushanba kuni Litvaning Rossiyadagi muvaqqat ishlar vakili Virjiniya Umbrasene Rossiya TIVga chaqirilgani xabar qilingandi.
Izoh (0)