Душанба куни Литва Ташқи ишлар вазирлиги Россиянинг мамлакатдаги муваққат ишлар вакили Сергей Рябоконга Калининград вилояти ва Россиянинг қолган қисми ўртасида транзит ўтадиган пўлат ва қора металл маҳсулотларига Европа Иттифоқи (ЕИ) санкциялари қўлланишини тушунтириб, нота юборди, дея хабар беради Литва ТИВ.
Учрашув чоғида Литва гўёки Калининград вилояти ва Россия ўртасидаги юк транзитини бутунлай тақиқлагани ҳақидаги маълумот рад этилди, дейилади вазирлик баёнотида.
«Европа Иттифоқининг санкциялар режимига тааллуқли бўлмаган йўловчилар ва юкларни Литва ҳудуди орқали Калининград вилоятига ва ундан Россияга олиб ўтиш давом этади. Литва ушбу транзитга ҳеч қандай бир томонлама, индивидуал ёки қўшимча чекловлар киритмаган. Литва турли ўтиш даврлари ва амал қилиш муддатларига эга бўлган Европа Иттифоқи санкцияларини изчил амалга оширмоқда» дея қўшимча қилинади хабарда.
Ташқи ишлар вазирлиги 2022 йил 15 мартда қабул қилинган Европа Иттифоқининг тўртинчи санкция тўпламида Европа Иттифоқининг Россия пўлат ва бошқа қора металл маҳсулотларининг Европа Иттифоқига импорти ва Европа Иттифоқи орқали транзитига нисбатан чекловчи чоралари ниҳоят 17 июндан кучга киритилгани ҳақида айтиб ўтган.
Аввалроқ, душанба куни Литванинг Россиядаги муваққат ишлар вакили Виржиния Умбрасене Россия ТИВга чақирилгани хабар қилинганди.
Изоҳ (0)