Rossiya Tashqi ishlar vazirligi Litva rasmiylarining Kaliningrad viloyatiga yuk tashish tranzitini bekor qilish haqidagi qarorini “ochiq dushmanlik” va xalqaro-huquqiy majburiyatlarni buzish, deb hisoblaydi.
20-iyun kuni Litva diplomatik missiyasi rahbari Virjiniya Umbrasene Rossiya Tashqi ishlar vazirligiga chaqirilgan, u yerda unga keskin norozilik bildirilgan va “cheklovlarni zudlik bilan bekor qilish” talabi qo‘yilgan.
Agar yaqin kelajakda Kaliningrad viloyati va Litva orqali Rossiya Federatsiyasining qolgan hududi o‘rtasida yuk tranziti to‘liq tiklanmasa, Rossiya o‘zining milliy manfaatlarini himoya qilish uchun choralar ko‘rish huquqini o‘zida saqlab qoladi”, — deyiladi Rossiya TIV bayonotida.
Litva temir yo‘llari 18-iyun kuni yarim tundan boshlab Litva hududi orqali Kaliningrad viloyatiga o‘tadigan Yevropa sanksiyalariga kiruvchi yuklar tranziti to‘xtatilganini e’lon qilgan edi. Litva Tashqi ishlar vazirligi rahbari Gabrielius Landsbergisning tushuntirishicha, Litva orqali Kaliningrad viloyatiga bir qator tovarlar tranzitini taqiqlash 17-iyundan kuchga kirgan Yevropa Ittifoqi sanksiyalari paketida nazarda tutilgan.
Izoh (0)