Farg‘onada ikki fuqaroning Qirg‘izistondagi o‘qishini ko‘chirib berish uchun 4,6 ming dollar olgan shaxslar ushlandi
Farg‘ona viloyatining Bag‘dod tumanida talabalarning o‘qishini ko‘chirib bermoqchi bo‘lgan shaxslar ushlandi, deb xabar beradi Bosh prokuratura huzuridagi departament.
Ma’lum qilinishicha, departamentning Bag‘dod tuman bo‘limi tomonidan tergovga qadar tekshiruv o‘tkazilgan. Tekshiruv davomida R.D., D.Y. va X.A. ismli fuqarolar qo‘shni Qirg‘iziston universiteti talabalari B. va D.ning ishonchiga kirib, ularning o‘qishini Andijon davlat tibbiyot instituti hamda Farg‘ona davlat universitetiga ko‘chirib berishni va’da qilgani aniqlangan.
Ular xizmati evaziga 800 dollar va 38 million so‘m hamda kontrakt to‘lovi uchun 36 million so‘mni, shuningdek, semestr imtihonlarini yakunlab berish evaziga yana 120 dollarni qo‘lga kiritgan. Tekshiruv davomida D.Y. tomonidan o‘z aybiga iqror bo‘lib qaytargan 800 dollari ashyoviy dalil sifatida olingan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda fuqaroning Tojikistondagi o‘qishini ko‘chirib berish uchun 2 ming dollar olgan ayol qo‘lga tushgani, Surxondaryoda fuqaroning Tojikistondagi o‘qishini 1,5 ming dollar evaziga ko‘chirib berishni va’da qilgan shaxs ushlangani to‘g‘risida xabar berilgandi. Mavzuga doir:
