Namangan viloyati IIB Uychi tumanida sodir bo‘lgan katta janjal yuzasidan ma’lumot berdi

Ijtimoiy tarmoqlarda Namangan viloyati Uychi tumanida katta janjal sodir bo‘lgani tasvirlangan video tarqaldi. Viloyat IIBning ma’lum qilishicha, holat yuzasidan jinoyat ishi qo‘zg‘atilgan.

Ma’lum qilinishicha, 12-iyun kuni soat 17:00 larda Uychi tumanida yashovchi 19 yoshli M.A. o‘ziga oldindan tanish bo‘lgan 31 yoshli E.I. bilan ikki kun avvalgi tortishuvni hal qilib olish maqsadida o‘zaro janjallashgan. Ikki shaxs tomonidan bo‘lgan ikki guruh jamiyatda yurish-turish qoidalarini qasddan mensimasdan, bir-birlarini urib tan jarohati yetkazgan vaqtda ichki ishlar organlari xodimlari voqea joyiga yetib borib, janjalni bartaraf etgan.

Ushbu holat bo‘yicha tuman IIB huzuridagi Tergov bo‘limi tomonidan Jinoyat kodeksining 277-moddasi (bezorilik) 3-qismi bilan jinoyat ishi qo‘zg‘atilib, 7 nafar shaxs protsessual tartibda ushlangan.

“Janjalda hech qanday o‘q otish quroli qo‘llanilmagan. Aholi o‘rtasida vahima uyg‘otishga sabab bo‘luvchi, tekshirilmagan ma’lumotlarni tarqatmasligingizni so‘raymiz”, — deyiladi munosabatda.

Avvalroq Yunusobodda avtobus haydovchilari va konduktor o‘zaro janjallashib ketgani, Urganchda 8 nafar shaxs Cobalt haydovchisini pichoqlagani, Toshkentda shifokor qabuliga navbatsiz kirgan opa-singil janjal ko‘targani to‘g‘risida xabar berilgandi.