Наманган вилояти ИИБ Уйчи туманида содир бўлган катта жанжал юзасидан маълумот берди

Ижтимоий тармоқларда Наманган вилояти Уйчи туманида катта жанжал содир бўлгани тасвирланган видео тарқалди. Вилоят ИИБнинг маълум қилишича, ҳолат юзасидан жиноят иши қўзғатилган.

Маълум қилинишича, 12 июнь куни соат 17:00 ларда Уйчи туманида яшовчи 19 ёшли М.А. ўзига олдиндан таниш бўлган 31 ёшли Э.I. билан икки кун аввалги тортишувни ҳал қилиб олиш мақсадида ўзаро жанжаллашган. Икки шахс томонидан бўлган икки гуруҳ жамиятда юриш-туриш қоидаларини қасддан менсимасдан, бир-бирларини уриб тан жароҳати етказган вақтда ички ишлар органлари ходимлари воқеа жойига етиб бориб, жанжални бартараф этган.

Ушбу ҳолат бўйича туман ИИБ ҳузуридаги Тергов бўлими томонидан Жиноят кодексининг 277-моддаси (безорилик) 3-қисми билан жиноят иши қўзғатилиб, 7 нафар шахс процессуал тартибда ушланган.

«Жанжалда ҳеч қандай ўқ отиш қуроли қўлланилмаган. Аҳоли ўртасида ваҳима уйғотишга сабаб бўлувчи, текширилмаган маълумотларни тарқатмаслигингизни сўраймиз», — дейилади муносабатда.

Аввалроқ Юнусободда автобус ҳайдовчилари ва кондуктор ўзаро жанжаллашиб кетгани, Урганчда 8 нафар шахс Cobalt ҳайдовчисини пичоқлагани, Тошкентда шифокор қабулига навбатсиз кирган опа-сингил жанжал кўтаргани тўғрисида хабар берилганди.