Samarqanddagi shifoxonada yosh bolasiga shafqatsiz munosabatda bo‘layotgan ayol videosi ijtimoiy tarmoqlarda tarqalib, keng muhokamalarga sabab bo‘ldi. Viloyat IIB matbuot xizmati holat yuzasidan jinoyat ishi qo‘zg‘atilganini ma’lum qildi.
IIB matbuot kotibi Jahongir Sagdullayevning bildirishicha, mazkur voqea 14-iyun kuni viloyatning Payariq tumanida sodir bo‘lgan. Tumanning “Boshqo‘rg‘on” MFYda yashab kelayotgan ayol (1988-yilda tug‘ilgan) 2020-yilda tug‘ilgan, voyaga yetmagan farzandini davolatish uchun shifoxonaga olib borgan. U yerda stress va asabiy holatda farzandiga nisbatan ushbu harakatlarni sodir etgan.
Ayni paytda ayol ruhiy sog‘lom, turmush o‘rtog‘i bilan yashab kelmoqda.
Sodir bo‘lgan holat yuzasidan esa Jinoyat kodeksining 110-moddasi 2-qismi “a, v” bandlari (voyaga yetmagan, ojiz ahvoldaligi aybdorga ayon bo‘lgan shaxsga nisbatan qiynash harakatlarini sodir etish) bilan jinoyat ishi qo‘zg‘atilib, tergov harakatlari olib borilmoqda.
Shuningdek, bildirilishicha, shu bolakay ulg‘ayayotgan oila bilan kelgusida amalga oshirilishi lozim bo‘lgan chora-tadbirlar tegishli mutasaddi tashkilotlar bilan hamkorlikda belgilab olinmoqda.
Avvalroq Qoraqalpog‘istonda ona o‘z farzandlariga zulm o‘tkazib, bolalarni xo‘rlagani tasvirlangan video tarqalgandi. Keyinroq ayol Qoraqalpog‘iston IIV xodimi bilan suhbatda nima sababdan farzandlarini kaltaklab kelganini ma’lum qilgandi. Holat yuzasidan jinoyat ishi qo‘zg‘atilgan.
Izoh (0)