25-iyundan boshlab Toshkent—Volgograd—Toshkent yo‘nalishlarida yo‘lovchi poyezdining harakati boshlanadi. Bu haqda “O‘zbekiston temir yo‘llari” xabar berdi.
Ma’lum qilinishicha, 324/323-sonli Toshkent—Volgograd—Toshkent yo‘nalishlarida yo‘lovchi poyezd haftaning shanba kuni soat 23:58 da Toshkent markaziy temiryo‘l vokzalidan jo‘nab ketadi va seshanba kuni soat 09:56 da Rossiyaning “Volgograd” temiryo‘l vokzaliga yetib boradi. Volgograddan esa seshanba kuni soat 19:59 da jo‘nab ketib, Toshkent markaziy vokzaliga juma kuni soat 06:54 da yetib keladi.
Ma’lumot uchun, Toshkentdan Volgogradgacha temiryo‘l orqali bo‘lgan bo‘lgan masofa 2996 kilometrni tashkil etadi. Poyezd 60 soat davomida harakatlanadi. 324/323-sonli yo‘nalishdagi yo‘lovchi poyezd 11 ta vagondan iborat: 3 kupe, 7 platskart va vagon-restoran.
Chipta narxi to‘g‘risidagi ma’lumotni, sotuv muddatiga qarab chegirmalarni hisobga olgan holda, “Chipta.railway.uz”, “E-ticket.railway.uz” saytlari orqali bilib olish mumkin.
Avvalroq 23-iyundan boshlab 5/6-sonli Toshkent—Samara—Toshkent yo‘nalishida yo‘lovchi poyezdining harakati yo‘lga qo‘yilishi to‘g‘risida xabar berilgandi.
Eslatib o‘tamiz, O‘zbekistonda ilk bor koronavirus aniqlangan 2020-yil 16-martdan boshlab temiryo‘l transporti qatnovlari to‘xtatilgan edi. 2020-yilning 15-avgustidan mahalliy avia va temiryo‘l qatnovlari bosqichma-bosqich tiklangan. 2020-yilning iyun boshlarida 14-iyundan boshlab Toshkent—Samara va Toshkent—Volgograd yo‘nalishlari bo‘yicha haftasiga bir marta temiryo‘l qatnovi qayta tiklanayotgani ma’lum bo‘lgandi.
Izoh (0)