Ijtimoiy tarmoqlarda Urganchda 8 nafar shaxs Cobalt haydovchisini pichoqlab ketgani va jabrlanuvchi voqea joyida vafot etgani haqida videoyozuv tarqaldi. Bosh prokuratura matbuot kotibi holat yuzasidan ma’lumot berdi.
Ma’lum qilinishicha, videoyozuvda aks etilgan holat bo‘yicha 2-iyun kuni jinoyat ishi qo‘zg‘atilib, hozirda Xorazm viloyati prokuraturasi tomonidan tergov harakatlari olib borilmoqda.
Jinoyat ishi doirasida bir nafar shaxsga Jinoyat kodeksining 97-moddasi (qasddan odam o‘ldirish) bilan ayb e’lon qilinib, “qamoqqa olish” ehtiyot chorasi qo‘llanilgan.
Qolgan 7 nafar shaxsga Jinoyat kodeksining 277-moddasi (bezorilik) bilan ayb e’lon qilinib, bir nafariga “qamoqqa olish” va 6 nafariga “munosib xulq-atvorda bo‘lish to‘g‘risida tilxat” ehtiyot choralari qo‘llanilgan. Tergov davom etmoqda.
Bundan oldin, Andijonda otasini haqoratlagan qo‘shnisini pichoqlab o‘ldirgan erkak ushlangani, Toshkent viloyatidagi novvoyxonalardan birida 34 yoshli erkak tanishini pichoqlagani, Toshkentda sevgan qizini pichoqlab, uni tinch qo‘yishini aytgan yigitni o‘ldirgan erkak 15 yilga qamalgani to‘g‘risida xabar berilgandi.
Izoh (0)