Oliy ta’lim vaziri Abduqodir Toshqulov Surxondaryo viloyatida bo‘lgan to‘ylardan birida kuyov kelinni urgani holati yuzasidan munosabat bildirdi. Vazir bu haqda 16-iyun kuni AOKAda o‘tkazilgan matbuot anjumanida gapirgan, deb xabar berdi “Daryo” muxbiri.
Avvalroq ijtimoiy tarmoqlarda to‘y kuni o‘yinda yutqazib qo‘ygan kuyov kelinni urgani aks etgan videolavha tarqalgandi. Keyinroq mazkur to‘y marosimi Surxondaryoda bo‘lgani va kelinni urgan kuyov javobgarlikka tortilgani to‘g‘risida ma’lum bo‘ldi. Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari, O‘zbekistonda gender tengligini ta’minlash komissiyasi a’zosi Saida Mirziyoyeva holatga munosabat bildirgandi.
Matbuot anjumanida Abduqodir Toshqulov o‘zini qiynagan ikkita savol haqida aytgan.
“Birinchisi, bular talabamasmikan? Chunki men kafolat berolmayman, bu kabi holat talaba bilan ham bo‘lishi mumkin. Ikkinchisi, ular Surxondaryodanmasmikan, degan savol. Sababini bilasizlar (ma’lumot uchun, vazir Abduqodir Toshqulov Surxondaryo viloyati, Boysun tumanida tug‘ilgan — tahr.). Ikkinchi savolimga javob to‘g‘ri bo‘ldi, ular surxondaryolik ekan. Birinchi savolimga javob — ular talaba emas ekan”, — deydi Abduqodir Toshqulov.
Oliy ta’lim vazirining ta’kidlashicha, bu kabi holatlar bo‘lmasligi uchun talabalar barcha fanlardan yaxshi o‘qishiga majbur qilish kerak.
“Maktabda bolalar fanlarni qanday o‘qiyapti? Ta’limning boshqa bo‘g‘ini bo‘lganligi uchun muhokama qilmoqchi emasman. O‘zining tarixini, o‘zining qadriyatini, o‘zining ma’naviyatini qanchalik bilyapti? Bu holat hozir ham yuragimga ta’sir qilib turibdi. Qanday bu ishni qilish mumkin, birovning farzandi, qizi axir u. Ayollar, qizlar birozgina jismoniy nuqtayi nazardan ojiza bo‘lishi mumkin, lekin huquq jihatdan ularning huquqi ko‘proq deb o‘ylayman. Ularni ko‘proq ardoqlashimiz kerak”, — deydi vazir.
Abduqodir Toshqulov davlat va jamiyat muammolarining yechimi ta’limda ekanligini aytdi.
“Ta’limning muammosi mana shu, undagi muammolarning ko‘rinishi mana shunaqa jirkanch holatda. Bittasi ham signal”, — deydi u.
Bosh prokuror matbuot kotibi Hayot Shamsutdinovning ma’lum qilishicha, kuyovga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) bilan ma’muriy ish qo‘zg‘atilgan.
Izoh (0)