Toshkent shahar Korrupsiyaga qarshi kurashish hududiy kengashining 14-iyun kuni bo‘lib o‘tgan navbatdagi yig‘ilishida bank tizimida uchrayotgan korrupsion holatlar, shuningdek, sohada korrupsiyaning oldini olish bo‘yicha ko‘rilayotgan choralar atroflicha muhokama qilindi. Bu haqda Antikorrupsiya agentligi axborot xizmati xabar berdi.
Ta’kidlanishicha, birgina Toshkent shahrida 2021-yilda banklar va ularning filiallarida faoliyat yuritgan 12 nafar shaxsga nisbatan 10 ta jinoyat ishi sudga yuborilgan. Ular tomonidan o‘zlashtirish yoki rastrata yo‘li bilan talon-toroj qilish, firibgarlik, mansabga sovuqqonlik bilan qarash, hokimiyat harakatsizligi kabi jinoyatlar sodir etilgan. Mazkur jinoyatlarga qo‘l urganlarning 2 nafari shahar va 10 nafari tuman darajasidagi bank tizimi xodimlari hisoblanadi.
Yig‘ilishda mavzu yuzasidan prokuror va boshqa mas’ullarning axboroti tinglanib, bu kabi qonunbuzilish holatlarining kelib chiqish sabablari va ularni bartaraf etish choralari xususida fikr almashilgan.
Muhokamalar jarayonida hududiy kengash faoliyati ham tanqidiy ko‘rib chiqilib, Toshkent shahrida korrupsiya holatlarini oldini olish borasidagi faoliyati qoniqarli emasligi qayd etilgan. Xususan, Toshkent shahrida 2020-yil davomida 59 ta korrupsion jinoyat sodir etilgan bo‘lsa, 2021-yilda bu raqam 184 tani tashkil etgan.
Shuningdek, poytaxt korrupsiyaga oid jinoyatlar sodir qilish ko‘rsatkichi bo‘yicha o‘tgan 3 oyda (fevral—aprel) respublikada eng yuqori o‘rinlarda turgani, xususan, fevral oyida — 37 ta, mart oyida — 50 ta, aprel oyida esa 69 ta korrupsiyaga oid jinoyat ishlari sudlarga yuborilgan.
Avvalroq O‘zbekistonda yilning 1-choragida 22 ta davlat tashkilotlarida jami 81,5 mlrd so‘mlik moliyaviy xato va kamchiliklar aniqlangani, Andijon o‘tgan 3 oyda korrupsion jinoyatlar eng ko‘p sodir etilgan viloyat bo‘lgani, O‘zbekistonda manfaatlar to‘qnashuvi alohida qonun bilan tartibga solinishi to‘g‘risida xabar berilgandi.
Izoh (0)