Тошкент шаҳар Коррупцияга қарши курашиш ҳудудий кенгашининг 14 июнь куни бўлиб ўтган навбатдаги йиғилишида банк тизимида учраётган коррупцион ҳолатлар, шунингдек, соҳада коррупциянинг олдини олиш бўйича кўрилаётган чоралар атрофлича муҳокама қилинди. Бу ҳақда Антикоррупция агентлиги ахборот хизмати хабар берди.
Таъкидланишича, биргина Тошкент шаҳрида 2021 йилда банклар ва уларнинг филиалларида фаолият юритган 12 нафар шахсга нисбатан 10 та жиноят иши судга юборилган. Улар томонидан ўзлаштириш ёки растрата йўли билан талон-торож қилиш, фирибгарлик, мансабга совуққонлик билан қараш, ҳокимият ҳаракатсизлиги каби жиноятлар содир этилган. Мазкур жиноятларга қўл урганларнинг 2 нафари шаҳар ва 10 нафари туман даражасидаги банк тизими ходимлари ҳисобланади.
Йиғилишда мавзу юзасидан прокурор ва бошқа масъулларнинг ахбороти тингланиб, бу каби қонунбузилиш ҳолатларининг келиб чиқиш сабаблари ва уларни бартараф этиш чоралари хусусида фикр алмашилган.
Муҳокамалар жараёнида ҳудудий кенгаш фаолияти ҳам танқидий кўриб чиқилиб, Тошкент шаҳрида коррупция ҳолатларини олдини олиш борасидаги фаолияти қониқарли эмаслиги қайд этилган. Хусусан, Тошкент шаҳрида 2020 йил давомида 59 та коррупцион жиноят содир этилган бўлса, 2021 йилда бу рақам 184 тани ташкил этган.
Шунингдек, пойтахт коррупцияга оид жиноятлар содир қилиш кўрсаткичи бўйича ўтган 3 ойда (февраль—апрель) республикада энг юқори ўринларда тургани, хусусан, февраль ойида — 37 та, март ойида — 50 та, апрель ойида эса 69 та коррупцияга оид жиноят ишлари судларга юборилган.
Аввалроқ Ўзбекистонда йилнинг 1-чорагида 22 та давлат ташкилотларида жами 81,5 млрд сўмлик молиявий хато ва камчиликлар аниқлангани, Андижон ўтган 3 ойда коррупцион жиноятлар энг кўп содир этилган вилоят бўлгани, Ўзбекистонда манфаатлар тўқнашуви алоҳида қонун билан тартибга солиниши тўғрисида хабар берилганди.
Изоҳ (0)