Kanada bosh vaziri Jastin Tryudo koronavirusga topshirgan testi musbat natija berdi. Bu haqda uning o‘zi Twitter orqali ma’lum qildi, deb yozadi “RBK”.
“COVID-19 testim musbat natija berdi”, — deb yozdi Tryudo.
Tryudo qo‘shimcha qilishicha, u o‘z-o‘zini yakkalash rejimiga o‘tib, shifokorlar tavsiyalariga rioya qiladi. Siyosatchi qayd etishicha, avval koronavirusga qarshi emlangani uchun o‘zini yaxshi his qilmoqda.
Tryudo Amerikalar sammitidan Ottavaga qaytib kelganidan keyin COVID-19’ga chalindi. Tadbir bu yil Los-Anjelesda bo‘lib o‘tdi. Sammitda G‘arbiy yarim shar mamlakatlari davlat va hukumat rahbarlari mintaqa davlatlari qarshisida turgan muammolarni yechish bo‘yicha umumiy strategiyalarni ishlab chiqadi.
Uchrashuvlar 30 dan ortiq mamlakatni o‘z ichiga oluvchi Amerika davlatlari tashkiloti rahbarligida bir necha yilda bir marta o‘tkaziladi.
Sammitda Tryudodan tashqari, AQSH prezidenti Jo Bayden ham qatnashdi. Tryudo Amerika prezidenti tomonidan tashkillashtirilgan ziyofatda qatnashdi, shuningdek, AQSH kongressi vakillar palatasi spikeri Nensi Pelosi bilan uchrashdi. Amerika ma’muriyati mansabdori Reuters’ga ma’lum qilishicha, Tryudo va Bayden yaqindan muloqot qilmagan.
Tryudo koronavirus bilan birinchi marta kasallanayotgani yo‘q. O‘tgan safar u yanvarda infeksiyaga chalingan edi.
Izoh (0)