Qirg‘iziston va Tojikiston chegarasida otishma yuz berdi, Tojikiston tomoni granatomyot va minomyotlarni qo‘lladi, deb xabar bermoqda Qirg‘iziston davlat milliy xavfsizlik qo‘mitasi Chegara xizmati 14-iyun kuni.
“7:00 atrofida (Toshkent vaqti bilan 6:00) Botken viloyati Botken tumanidagi Buloqboshi qishlog‘ida Tojikistonning ‘Ko‘h’ chegara posti tomonidan Qirg‘izistonning ‘Buloqboshi’ chegara postiga qarata o‘q otildi. Bunga javoban Qirg‘iziston tomonidan Tojikiston postiga qarata javob o‘qi otildi”, — deyiladi chegara xizmati xabarida.
Uning ma’lumotlariga ko‘ra, ikki tomon chegarachilari darhol jangovar pozitsiyalarni egallagan. Qirg‘izistonning Botken viloyati bo‘yicha chegara vakili va Tojikistonning So‘g‘d viloyati bo‘yicha chegara vakili telefon orqali suhbatlashgan. Voqea joyiga tomonlarning chegara otryadlari boshliqlari jo‘nab ketgan.
“7:50 da Tojikiston tomoni granatomyot va minomyotlar orqali yana otishma boshladi. 8:10 da otishma to‘xtadi. Ayni paytda otishma sabablarini aniqlashtirish va vaziyat kuchayib ketishiga yo‘l qo‘ymaslik uchun tomonlarning chegara vakillari uchrashuv o‘tkazmoqda”, — deya ma’lum qildi Chegara xizmati.
Chegaraning qirg‘iz-tojik qismidagi vaziyat keskin deb tavsiflanmoqda.
Qirg‘iziston va Tojikiston chegarasi vaqti-vaqti bilan ikki mamlakat mahalliy aholisi va chegarachilari o‘rtasidagi nizolar hududiga aylanib turadi. Bunga sabab delimitatsiya qilinmagan yerlar bo‘lib, u yerlarda davlatlar o‘rtasidagi chegara qayerdan o‘tishini aniqlab bo‘lmaydi.
Izoh (0)