Канада бош вазири Жастин Трюдо коронавирусга чалинди

Канада бош вазири Жастин Трюдо коронавирусга топширган тести мусбат натижа берди. Бу ҳақда унинг ўзи Twitter орқали маълум қилди, деб ёзади «РБК».

«COVID-19 тестим мусбат натижа берди», — деб ёзди Трюдо.

Трюдо қўшимча қилишича, у ўз-ўзини яккалаш режимига ўтиб, шифокорлар тавсияларига риоя қилади. Сиёсатчи қайд этишича, аввал коронавирусга қарши эмлангани учун ўзини яхши ҳис қилмоқда.

Трюдо Америкалар саммитидан Оттавага қайтиб келганидан кейин COVID-19’га чалинди. Тадбир бу йил Лос-Анжелесда бўлиб ўтди. Саммитда Ғарбий ярим шар мамлакатлари давлат ва ҳукумат раҳбарлари минтақа давлатлари қаршисида турган муаммоларни ечиш бўйича умумий стратегияларни ишлаб чиқади.

Учрашувлар 30 дан ортиқ мамлакатни ўз ичига олувчи Америка давлатлари ташкилоти раҳбарлигида бир неча йилда бир марта ўтказилади.

Саммитда Трюдодан ташқари, АҚШ президенти Жо Байден ҳам қатнашди. Трюдо Америка президенти томонидан ташкиллаштирилган зиёфатда қатнашди, шунингдек, АҚШ конгресси вакиллар палатаси спикери Нэнси Пелоси билан учрашди. Америка маъмурияти мансабдори Reuters’га маълум қилишича, Трюдо ва Байден яқиндан мулоқот қилмаган.

Трюдо коронавирус билан биринчи марта касалланаётгани йўқ. Ўтган сафар у январда инфекцияга чалинган эди.