Litva Ukraina uchun Estoniyada ishlab chiqarilgan oltita razvedka dronlarini sotib oldi, ulardan to‘rttasi Ukraina tomoniga hozir yuborilgan bo‘lsa, yana ikkitasi ikki oy ichida jo‘natiladi. Ukraina harbiylari allaqachon ular bilan ishlashni o‘rganmoqda, deya ma’lum qildi may oyida Bayraktar TB2 uchun pul yig‘gan Laisves telekanali rahbari Andryus Tapinas.
“Biz oltita zamonaviy EOS C-VTOL razvedka dronlarini sotib oldik, ular elektr energiyasi bilan ishlaydi, minimal iz qoldiradi, lazer bilan jihozlangan, istalgan joyga uchadi va qo‘nadi”, — deb yozdi u Facebook’da.
Tapinasning so‘zlariga ko‘ra, ishlab chiqaruvchilar qurilmalarga dushmanni yo‘ldan adashtiruvchi, parvoz va qo‘nish joylarini ko‘zdan bekituvchi maxsus antenna hamda ehtiyot qismlar to‘plamini qo‘shib beradi. Bitimning umumiy qiymati 990 000 yevroni tashkil etdi. Tapinas Estoniya qurilmalarini Magyla deb atadi. Twitter’da u Ukraina harbiylari dronlarni boshqarishni allaqachon o‘rganayotganini qo‘shimcha qildi.
Shuningdek, u Turkiyaning Bayraktar dronlari birinchi partiyasini xarid qilish bo‘yicha kelishuvga erishilganini ma’lum qildi.
2-iyun kuni Litva hukumati Turkiya bilan Ukraina armiyasi ehtiyojlari uchun Bayraktar dronlarini sotib olish bo‘yicha shartnoma imzolagan edi.
Izoh (0)