Rossiya kuchlari Ukrainadagi maxsus operatsiyalar chog‘ida birinchi navbatda Donetsk va Lugansk xalq respublikalarini himoya qilishga intilmoqda, deya ma’lum qildi Rossiya prezidenti matbuot kotibi Dmitriy Peskov.
“Umuman olganda, respublikalarni himoya qilish — maxsus harbiy operatsiyaning asosiy maqsadi”, — dedi u.
Bir kun avval, 13-iyunda DXR rahbari Denis Pushilin Donetsk va respublikaning boshqa shaharlari o‘qqa tutilishi sababli ukrain qo‘shinlari “barcha chegaralarni bosib o‘tgani” haqida aytgan edi. U: “Urush olib borishning taqiqlangan usullari qo‘llanilmoqda, Donetskning turar-joy va markaziy tumanlari o‘qqa tutilmoqda, shuningdek, DXRning boshqa shaharlari va aholi punktlari ham o‘t ostida qolmoqda”, — dedi.
O‘qqa tutishlar tufayli “ittifoq kuchlarining barcha zarur qo‘shimcha kuchlarini” ishga solish rejalashtirilmoqda, deya davom etdi Pushilin, gap asosan Rossiya haqida borayotganini qayd etib. Uning aytishicha, bu masalada “anglashuvga kelingan”, aynan kim bilanligiga aniqlik kiritmadi.
Donetsk yangiliklar agentligi qayd etishicha, 13-iyun kuni Ukraina qurolli kuchlari DXRga nizo boshidan buyon rekord darajada ko‘p zarbalar bergan. Ular, shu jumladan, “Uragan” va “Grad” baravar o‘t ochish reaktiv tizimlari orqali berilgan.
Xususan, Donetskda bir bozor o‘q yomg‘iri ostida qolgan, uch kishi halok bo‘lgan. Tug‘ruqxona ham hujumga uchragan, bemorlar yerto‘laga evakuatsiya qilingan.
22-aprel kuni Rossiya Mudofaa vazirligi harbiy operatsiya ikkinchi bosqichining maqsadi Donbass va Janubiy Ukraina ustidan to‘liq nazorat o‘rnatish ekanini aytgandi. May boshida Rossiya tashqi ishlar vaziri Sergey Lavrov maxsus operatsiya sharqiy Ukraina va Rossiya xavfsizligini ta’minlash maqsadini ko‘zlashini ma’lum qilgandi. Shu bilan birga, vazirning so‘zlariga ko‘ra, Moskva Ukrainada hokimiyat almashishiga erishmoqchi emas.
Izoh (0)