Gruziya hukumati Tbilisi Kiyevdan ko‘ra ko‘proq YI maqomini olishga munosib deb hisoblamoqda

Gruziya Ukraina yoki Moldovadan ko‘ra ko‘proq Yevroittifoq a’zoligiga nomzodlik maqomini olishga munosib. Bu haqda Gruziya bosh vaziri Irakliy Garibashvili hukumat majlisida ma’lum qilgan.

Bosh vazirning so‘zlariga ko‘ra Tbilisi Kiyev va Kishinyovni barcha yo‘nalishlarda kamida “o‘nta to‘p farqi bilan ortda qoldirmoqda”, hatto bir qator sohalarda Yevropa ittifoqiga a’zo mamlakatlardan ham o‘zib ketgan.

“Agar ittifoq a’zoligiga nomzodlik maqomi urush bilan belgilanadigan bo‘lsa, biz bunday maqomni olmaslikni afzal ko‘ramiz. Biz mazkur maqom adolatli ravishda berilishini istaymiz”, — degan Garibashvili.

Shuningdek, Gruziya hukumati rahbari mamlakatning 30 yil davomida demokratiya va islohotlar uchun olib borgan kurashi, oxirgi to‘qqiz yilda hukumat olib borgan ishlar bilan YI a’zoligiga munosibligini ta’kidlagan, deya xabar qilgan Agenda.

Gruziya mart oyida Ukrainadan keyin Moldova bilan birgalikda YI a’zoligiga qabul qilinish uchun so‘rov topshirgan. Mamlakatning Yevroittifoq hamda NATO’ning xavfsizlik tuzilmalariga kirish tashabbusi Gruziya konstitutsiyasida belgilab qo‘yilgan.

Yevrokomissiya Gruziya, Ukraina hamda Moldovaning so‘rovlari bo‘yicha qarorni 17-iyunda chiqarishni rejalashtirmoqda. Bloomberg nashrining o‘z manbalariga tayanib yozishicha Yevrokomissiya Kiyevga qonun ustuvorligi va korrupsiyaga qarshi kurashish tavsiyasi bilan nomzod maqomini bermoqchi. Shunga qaramay mazkur qaror Yevroittifoqning barcha a’zolarining roziligi bilan chiqariladi.

Yevropa diplomatiyasi rahbari Jozep Borrel 13-iyun kuni Ukrainaga YI a’zoligiga nomzodlik maqomi berilishi haqidagi savolga javob qaytarib, o‘z qadriyatlariga, madaniyati va tarixiga ega mamlakat islohotlar o‘tkazgan holda Yevropaga qo‘shilishga tayyorgarlik ko‘rgani, Yevroittifoq esa o‘z sarhadlarini yanada kengaytirmoqchi ekanligini qayd etgan.