11-iyun kuni Toshkentdagi “Paxtakor” stadionida U-23 Osiyo kubogining chorak finali doirasida O‘zbekiston termasi Iroq milliy jamoasiga qarshi o‘yin o‘tkazgandi. O‘yinini yoritishga borgan “Sevimli” telekanali tasvirchisi ichki ishlar organi xodimlari tomonidan kaltaklangan. Bu haqda “Zamon.uz” nashri xabar berdi, biroq material hozirda o‘chirib tashlangan, shunga qaramay, Facebook’da uning nusxasi saqlanib qolgan.
Ma’lum qilinishicha, futbol chempionatining chorak final bahslarini yoritish “Sevimli” telekanali “Zamon” informatsion dasturining ham ijodiy rejasida bo‘lgan. AFC bahslarni yoritish uchun akkreditatsiyadan o‘tkazgan. Bunga qadar bo‘lgan o‘yinlar ham sport muxbiri va uning tasvirchisi tomonidan yoritib kelingan. “Biroq kechagi o‘yin hamkasblarimiz uchun qimmatga tushdi”, — deyiladi materialda.
21:00 lar atrofida (intervyu olish maqsadida) ikki xodim “Paxtakor” stadioniga borib organ xodimlarining qarshiligiga uchragan. Futbolni yoritish uchun berilgan maxsus ruxsatnomani ko‘rsatishlariga qaramay, ular haqoratlangan.
Shundan so‘ng ijodiy guruh o‘zining e’tirozlarini bildirgan va stadion oldidagi holatni tasvirga olishni boshlagan. Organ xodimlari esa tasvirchining ruxsatnomasiga chang solgan. Kamerasini tortib olgan. Tasvirchining qo‘lini orqaga qayirib, jurnalistdan uzoqlashtirgan.
“Faoliyatim davomida birinchi marta shunday holatga duch keldim. Chunki konfliktga boradigan odam emasman. Buni meni yaqindan taniganlar yaxshi bilishadi. Ochig‘i, o‘sha mahalda o‘zimni jinoyatchidek his qildim. Organ xodimlaridan biri dabdurustdan mikrofonimga tashlandi va uni kimgadir uloqtirdi, qo‘limni orqaga qayirdi. Ikkinchisi esa kamarimdan mahkam ushlab oldi”, — deydi jurnalist.
“Bu jarayon soniyalar ichida sodir bo‘ldi-ki, nima bo‘layotganini anglab-anglolmasdim. Odamlar OAV xodimlari tepkilanayotganini tasvirga olayotgandi. Ko‘pchilik oldida izza bo‘lganimiz qoldi. Qo‘llarimizni qayirib, Shayxontohur tuman IIB binosiga olib borib, navbatchilik qismiga topshirishdi.
Tasvirchim og‘riqqa chidolmay, ichki ishlar binosi koridorida yerga o‘tirib qoldi. Meni esa tashqariga chiqarib yuborishdi. Operatorimning sog‘ligi yomonlashayotganini ko‘rib, tez tibbiy yordamga qo‘ng‘iroq qilishga majbur bo‘ldim. Tibbiyot xodimi ichki ishlar bo‘limida qoldirish xavfli ekanini, zudlik bilan shifoxonaga olib ketish lozimligini aytdi. Shundan so‘ng sherigimni Respublika shoshilinch tibbiy yordam ilmiy markaziga olib ketishdi”, — deydi jurnalist.
Tasvirchi bo‘lgan voqea haqida gapirar ekan, do‘pposlash vaqtida organ xodimlari unga elektroshoker qo‘llaganini, agar nimjonroq odam bo‘lsa, buncha kaltaklashdan keyin o‘lib qolishi ham hech gap emasligini ta’kidlagan.
“Urib qo‘limdagi kamerani tortib oldi. Har tomonimdan musht tushirdi lekin yiqilmadim. 6-7 kishi bir vaqtning o‘zida tepkilardi. Shu payt ulardan biri ikki marta ko‘krak qismimga elektroshoker tekkazdi. Men yiqildim. Qolganini aniq eslolmayman. Tanamdagi og‘riq zo‘ridan ko‘zim oldi dam qorong‘ilashib, dam xiralashib... Ma’lum vaqt hushimni yo‘qotdim.
Meni shifoxonaga olib borganda hamkasblarim 102 ga xabar berib, holatni tushuntirgan. Ammo mana bir sutkaki, ulardan darak yo‘q. Meniku, jonim omon qoldi. Biroq o‘rnimda boshqa “slabiyroq” odam bo‘lganda, u zarblarga dosh berolmay, o‘lib ham qolishi mumkin edi. Bir odamning taqdiriga shu qadar befarq qaraladimi?”, — deydi tasvirchi.
Qayd etilishicha, tasvirchi kasalxonaga olib ketilgandan keyin jurnalist kamera, shtativ, mikrofon va ruxsatnomalarini qaytarib berishni so‘ragan. Uning ko‘z oldida fleshkani Toshkent shahar IIBBga yuborishgan va “o‘zing o‘sha yerdan olasan” deyishgan. Bu orada futbol allaqachon tugab ham bo‘lgan. Soat tungi 02:10 larda muxbir shikastlangan kamera va shtativni olgan. Biroq mikrofon va ruxsatnomalar hamon qaytarilmagan.
“Eng qizig‘i, bo‘lar ish bo‘lgandan so‘ng muxbirdan ichki ishlar xodimlari kechirim so‘rab, ortiqcha gap qilmasligi va biron joyda gapirib yurmasligini aytgan”, — deyiladi xabarda.
G‘iyosovning yozishicha, “Paxtakor” stadionida O‘zbekiston—Iroq futbol terma jamoalari o‘yini jarayonida jamoat tartibini saqlashga biriktirilgan Ichki ishlar organlari va Milliy gvardiya xodimlari tomonidan soat 21:00 dan keyin stadionda bo‘sh joylar qolmagani sababli, fuqarolarni stadionga kirishi to‘xtatilgan.
Shu vaqtda, Alisher Navoiy ko‘chasi tarafdan stadionga kirish uchun tashkil etilgan tashqi nazorat perimetrda ayrim fuqarolar norozilik bildirib, stadionga kirishga harakat qilib, janjal uyushtirishgan. Xodimlar tomonidan kelib chiqishi mumkin bo‘lgan bezorilik harakatlari zudlik bilan bartaraf etilib, bir nechta fuqaro tuman IIBga olib borilgan.
Aniqlanishicha, fuqarolar orasida “Sevimli” telekanali “Zamon” dasturining vakillari ham bo‘lgan hamda odamlar o‘rtasidagi mushtlashuv jarayonida telekanal operatori T.I.ga tan jarohatlari yetkazilib, texnik ashyolari zarar ko‘rgan. Unga o‘z vaqtida tibbiy yordam ko‘rsatilib kasalxonaga yetkazilgan.
“Shu kuni boshqa fuqarolardan tan jarohati olgani bo‘yicha ma’lumotlar kelib tushmagan. Hozirda holat yuzasidan tekshiruv tayinlanib, jamoat tartibini buzgan fuqarolarni aniqlash bo‘yicha ishlar olib borilmoqda”, — deyiladi munosabatda.
Izoh (0)