Qashqadaryo viloyatining G‘uzor tumanidagi xonadonda eshak so‘yilayotgani haqida xabar berilgandi. Tuman hokimligi axborot xizmatining “Daryo”ga ma’lum qilishicha, holat yuzasidan qonunbuzarlarga sud qarori e’lon qilingan.
Eshak so‘yish ishi tumanning “Eshonquduq” mahallasi Abduhamid qishlog‘idagi xonadonlardan birida sodir bo‘lgan edi. G‘uzor tumani hokimi Bekzod Suyunov keng jamoatchilik bilan holatni muhokama qilgan.
Jinoyat ishlari bo‘yicha Nishon tumani sudi tomonidan o‘z xonadonida eshak so‘yishni kasb qilib olgan fuqaro N.R. va uning turmush o‘rtog‘i S.A.ning xatti-harakatlari ko‘rib chiqilib, sud hukmi o‘qilgan.
Sud qaroriga ko‘ra, fuqaro N.R.ga nisbatan Ma’muriy javobgarlik to‘g‘risidagi kodeksning 111-moddasi (hayvonlarga nisbatan shafqatsiz munosabatda bo‘lish) 2-qismi va 161-moddasi (shaharlarni va boshqa aholi punktlarini obodonlashtirish qoidalarini buzish) bilan 10 sutka qamoq jazosi tayinlangan. S.A.ga nisbatan esa shu kodeksning 111-moddasiga asosan eng kam ish haqining 2 barobari miqdorida jarima belgilangan.
Shuningdek, xonadonda eshak so‘yish holati haqida xabar bergan fuqaro A.Sh.ga ko‘rsatilgan tan jarohati va haqorat yuzasidan fuqaro S.A.ga nisbatan surishtiruv harakatlari olib borilmoqda.
Avvalroq Qashqadaryoda eshak so‘yish bilan shug‘ullangan to‘rt kishi ushlangani, Andijonda itlarni so‘yib, iste’mol qilish bilan shug‘ullanib kelgan shaxs qo‘lga olingani haqida xabar berilgan.
Izoh (0)