Rossiya prezidenti Vladimir Putinning farmoni bilan Natalya Poklonskaya (Qrimning sobiq prokurori, shuningdek, 2016—2021-yillarda “Yagona Rossiya”dan Davlat Dumasi deputati bo‘lgan) “Rossotrudnichestvo” rahbari o‘rinbosari lavozimidan ozod qilindi.
Poklonskaya o‘zining Telegram-kanalida “Rossotrudnichestvo”ni “boshqa ishga o‘tgani sababli” tark etganini yozdi. “Qo‘llab-quvvatlovi va bildirgan ishonchi uchun prezidentimizdan minnatdorman!”, — deb yozgan Poklonskaya. U faoliyatini qayerda davom ettirishini aytmagan.
Ma’lumot uchun, “Rossotrudnichestvo” — MDH davlatlari, xorijda yashovchi vatandoshlar ishlari va xalqaro gumanitar hamkorlik bo‘yicha Rossiya federal agentligi.
Fevral oyi boshida Putin Natalya Poklonskayani Rossiyaning Kabo-Verdedagi elchisi lavozimidan ozod qilgan va “Rossotrudnichestvo” rahbari o‘rinbosari etib tayinlagan edi. Poklonskaya “shaxsiy sharoiti” tufayli elchi lavozimidan bosh tortgan.
Ukrainada urush boshlanganidan so‘ng, Poklonskaya Rossiya bosqinini “falokat” deb atagan, ruslar va ukrainaliklarni “bir-biriga nisbatan nafrat qo‘zg‘atadigan bu jinnilikni to‘xtatishga” chaqirgan hamda Z harfi Rossiya bosqinining asosiy belgisiga aylanganini — bu “Rossiya uchun ham, Ukraina uchun ham fojia va qayg‘u” ekanini aytgan.
Poklonskayaning Z harfi haqidagi bayonotidan so‘ng, “Rossotrudnichestvo” “barcha kodekslar va me’yoriy-huquqiy baza talabiga asoslanib, xulosa chiqarilishini” e’lon qildi.
Natalya Poklonskaya — asli Ukrainaning Voroshilovgrad (Lugansk) viloyatidan. Uning tug‘ilgan qishlog‘i 2014-yildan keyin LXR nazorati ostiga o‘tdi. Poklonskaya bolaligidanoq Qrimda yashagan. U prokuraturada ishlagan, Qrim Rossiyaga qo‘shilganidan keyin Qrim prokurori bo‘lgan. Ukrainada Poklonskaya davlatga xiyonatda ayblangan.
Davlat Dumasidagi besh yillik faoliyatidan so‘ng Poklonskaya 2021-yilda parlamentning yangi chaqiruvi uchun nomzodini qo‘ymadi. “RBK” ma’lumotlariga ko‘ra, “Yagona Rossiya” va Kreml Poklonskayani “uning unchalik tizimli bo‘lmagan xatti-harakatlari va ekstravagant bayonotlari tufayli” parlamentda ko‘rishni istamagan.
Izoh (0)