Россия президенти Владимир Путиннинг фармони билан Наталя Поклонская (Қримнинг собиқ прокурори, шунингдек, 2016—2021 йилларда «Ягона Россия»дан Давлат Думаси депутати бўлган) «Россотрудничество» раҳбари ўринбосари лавозимидан озод қилинди.
Поклонская ўзининг Telegram-каналида «Россотрудничество»ни «бошқа ишга ўтгани сабабли» тарк этганини ёзди. «Қўллаб-қувватлови ва билдирган ишончи учун президентимиздан миннатдорман!», — деб ёзган Поклонская. У фаолиятини қаерда давом эттиришини айтмаган.
Маълумот учун, «Россотрудничество» — МДҲ давлатлари, хорижда яшовчи ватандошлар ишлари ва халқаро гуманитар ҳамкорлик бўйича Россия федерал агентлиги.
Февраль ойи бошида Путин Наталя Поклонскаяни Россиянинг Кабо-Вердедаги элчиси лавозимидан озод қилган ва «Россотрудничество» раҳбари ўринбосари этиб тайинлаган эди. Поклонская «шахсий шароити» туфайли элчи лавозимидан бош тортган.
Украинада уруш бошланганидан сўнг, Поклонская Россия босқинини «фалокат» деб атаган, руслар ва украиналикларни «бир-бирига нисбатан нафрат қўзғатадиган бу жинниликни тўхтатишга» чақирган ҳамда З ҳарфи Россия босқинининг асосий белгисига айланганини — бу «Россия учун ҳам, Украина учун ҳам фожиа ва қайғу» эканини айтган.
Поклонскаянинг З ҳарфи ҳақидаги баёнотидан сўнг, «Россотрудничество» «барча кодекслар ва меъёрий-ҳуқуқий база талабига асосланиб, хулоса чиқарилишини» эълон қилди.
Наталя Поклонская — асли Украинанинг Ворошиловград (Луганск) вилоятидан. Унинг туғилган қишлоғи 2014 йилдан кейин ЛХР назорати остига ўтди. Поклонская болалигиданоқ Қримда яшаган. У прокуратурада ишлаган, Қрим Россияга қўшилганидан кейин Қрим прокурори бўлган. Украинада Поклонская давлатга хиёнатда айбланган.
Давлат Думасидаги беш йиллик фаолиятидан сўнг Поклонская 2021 йилда парламентнинг янги чақируви учун номзодини қўймади. «РБК» маълумотларига кўра, «Ягона Россия» ва Кремль Поклонскаяни «унинг унчалик тизимли бўлмаган хатти-ҳаракатлари ва экстравагант баёнотлари туфайли» парламентда кўришни истамаган.
Изоҳ (0)