O‘zbekistonda “San’at eksporti” milliy loyihasi joriy etilishi mumkin

Madaniyat vazirligi “O‘zbek xalqining milliy qadriyatlari, nomoddiy madaniy merosini muhofaza qilish va ommalashtirish to‘g‘risida”gi prezident qarori loyihasini muhokamaga qo‘ydi.

Hujjat bilan quyidagilar:

• 2022—2026-yillarda nomoddiy madaniy merosni muhofaza qilish davlat dasturi;
• YUNESKOning tegishli xalqaro ro‘yxatlariga O‘zbekiston hududidagi nomoddiy madaniy meroslarni kiritish bo‘yicha tayyorlanadigan nomzodnomalar;
• nomoddiy madaniy merosni tadqiq etish bo‘yicha tashkil etiladigan mahalliy va xorijiy kompleks etnofolklor ekspeditsiyalar ro‘yxati;
• nomoddiy madaniy merosni ilmiy tadqiq etish va targ‘ib qilish bo‘yicha fundamental va maqsadli grantlar ro‘yxati;
• Nomoddiy madaniy meros namunalarini innovatsion axborot texnologiyalardan foydalangan holda raqamli hujjatlashtirish tasdiqlanadi.

Belgilanishicha, davlat dasturini amalga oshirish, nomoddiy madaniy meros elementlarini YUNESKOning tegishli xalqaro ro‘yxatlariga kiritish, kompleks folklor ekspeditsiyalar tashkil etish, fundamental va maqsadli grantlar hamda nomoddiy madaniy merosni raqamli hujjatlashtirishga doir xarajatlar davlat budjeti hamda qonunchilik hujjatlari bilan taqiqlanmagan boshqa manbalar hisobidan qoplanadi.

Shuningdek, qaror bilan xorijiy davlatlarda O‘zbekistonning xalq ijodiyoti san’atini keng targ‘ib etish orqali baxshi, jirov, oqin va folklor-etnografik ansambllarning gastrol safarlarini tizimli amalga oshirish maqsadida 2022—2026-yillarga mo‘ljallangan “San’at eksporti” milliy loyihasi joriy etiladi.

Madaniyat vazirligi, Investitsiyalar va tashqi savdo vazirligi, Tashqi ishlar vazirligi uch oy muddatda “San’at eksporti” milliy loyihasini xorijiy davlatlarda amalga oshirish bo‘yicha manzilli rejasini tasdiqlashi va amalga oshirishi kerak.

Bunda quyidagilar nazarda tutiladi:

• baxshi, jirov, oqin va folklor-etnografik ansambllarning xorijiy davlatlarda madaniy xizmat ko‘rsatish servisi tizimi orqali konsert-tomosha dasturlarini belgilangan tartibda tizimli tashkil etish;
• qadriyatlar va urf-odatlar asosida tayyorlangan milliy modalar namoyishi, hunarmandchilik ko‘rgazmalarini amalga oshirish;
• xorijiy davlatlardagi vatandoshlar tomonidan keng targ‘ib etilishini ta’minlash bo‘yicha o‘zbek milliy qadriyatlari va madaniyatini o‘zida mujassam etgan kiyimlar va hunarmandchilik mahsulotlarini doimiy yetkazib berish.

2023-yil 1-yanvardan boshlab:

• nomoddiy madaniy merosni doimiy rivojlantirish va targ‘ib etib borish maqsadida “Tayyorlash – o‘rgatish – o‘rganish – tiklash – saqlash – ommalashtirish – sotish” uzluksiz yaxlit tizimi asosida klasterlar tashkil etiladi;

do‘mbira, chanqo‘biz, sibizg‘a cholg‘u ustalari, kashtachilik, hunarmandchiligi, qorabayir otlarini parvarish qilish hamda ularni realizatsiya bilan shug‘ullanuvchi shaxslar:

• o‘zini o‘zi band qiladigan shaxslar uchun faoliyat (ishlar, xizmatlar) turlari ro‘yxatiga kiritiladi;
• bevosita ushbu faoliyat uchun tijorat banklaridan olgan kreditlarining Markaziy bankning qayta moliyalash stavkasi bo‘yicha bo‘lgan qismi Tadbirkorlikni rivojlantirish agentligi huzuridagi Tadbirkorlik faoliyatini qo‘llab-quvvatlash davlat jamg‘armasi hisobidan kafillik va/yoki kompensatsiya shartlari asosida qoplab beriladi;
• do‘ppido‘zlik va egar-jabduq yasash bilan shug‘ullanayotgan hunarmandlar ishtirokida 1 yillik usta-shogird maktablari tashkil qilinadi hamda ushbu maktabni yo‘lga qo‘ygan ustalar uchun 1 yil davomida besh barobar bazaviy hisoblash miqdorida oylik maosh Vazirlar Mahkamasining zahira jamg‘armasidan to‘lanadi.

Shuningdek, 2023-yil 1-mayga qadar o‘zbek xalq milliy qadriyatlari va ma’naviy merosini asrab-avaylash hamda rivojlantirishga qaratilgan “Qadriyat” platformasi yaratiladi.