Қозоғистоннинг Атирау шаҳридаги Аҳолига хизмат кўрсатиш марказига мингга яқин Ўзбекистон фуқаролари ёғилиб келди, деб ёзади «Орда.кз». Улар учун Россия Федерацияси билан чегара ёпиқ бўлгани сабабли, улар Қозоғистонда вақтинчалик ишлаш учун рухсатнома олмоқчи бўляпти.
Улар ўз паспортларини янгилагани туфайли, вақтинчалик ишлаш учун қайтадан рухсатнома олиши зарур. Шу сабабли марказда эрта тонгдан кечгача навбатлар кузатилмоқда.
«Авваллари Қозоғистонда ишлаш учун рухсатнома Миграция полицияси бошқармаси ходимлари томонидан берилган бўлса, энди Меҳнат вазирлиги томонидан берилмоқда. Шу сабабли барча чет элликлар Аҳолига хизмат кўрсатиш марказларига бориб, ҳужжатларини топширмоқда. Ўзбекистонда чет элга чиқиш паспорти жорий қилинди, оддий паспорт билан энди чет элда ишлашга рухсат берилмайди. Агар бизнинг базамизда уларнинг яшил паспорти турган бўлса, бирдан рад жавоби олишади», — дея аниқлик киритди «Ҳукумат фуқаролар учун» давлат корпорацияси Атирау филиали бошлиғи ўринбосари Жалгас Жарасов.
Аҳолига хизмат кўрсатиш маркази мутахассислари жорий ой ўрталарига келиб, Ўзбекистон фуқаролари оқими камайишига умид қилмоқда. Бир кунда марказга қарийб 1000 киши ҳужжатларини топширмоқда, ходимлар уларнинг кўпчилигини рўйхатга олишга улгурган.
Жарасов қайд этишича, ташриф буюрувчилар учун барча шароитлар яратилган — қуёшдан пана қилинган шийпончалар ва ўриндиқлар ўрнатилган. Бироқ юзлаб ўзбекистонликлар навбат кутмоқда.
«Тонгги 4 да келганимда, оломон тўпланиб улгурганди. Бугун ҳам улгурмайман, одамлар жуда кўп. Мен ишлайманми ёки шу ерда кутиб ўтаравераманми?» — деди Ўзбекистон фуқароси Иброҳим Баҳромов.
Барча шароитлар яратилган, дейишганига қарамасдан, нашр мухбирлари ташрифи чоғида Ўзбекистон фуқаролари йўлакларда ўтирарди, уларнинг бир қисми эса кўчада, қуёш остида турарди, дейилади хабарда.
Изоҳ (0)