Janubiy Koreyaning “Kalmar o‘yini” seriali rasman ikkinchi mavsumga ega bo‘ladi. Netflix striming servisi “Joy joyiga” izohi ostida qisqa tizerni taqdim etdi, deb xabar beradi “Film.ru”.
Loyiha yaratuvchisi Xvan Don Xyok ham serialning barcha muxlislariga maktub yo‘llagan. “‘Kalmar o‘yini’ning birinchi mavsumini tasvirga olish uchun 12 yil kerak bo‘ldi. Netflix’dagi eng ommalashgan shou bo‘lishi uchun esa 12 kun kifoya qildi… Bizning shoumizni yaxshi ko‘rib tomosha qilayotganingiz uchun rahmat. Ki-Xun qaytadi. Frontmen qaytadi. 2-mavsumga yaqin qoldi… Shuningdek, Chi-Yonning yigiti Chxol Su bilan tanishasiz. Yangi raundga qo‘shiling”, — deb yozgan u.
Serialning 2-mavsumi Netflix’da 2024-yildan oldin paydo bo‘lmaydi. Hozircha aniq sanasi ma’lum emas.
Eslatib o‘tamiz, “Kalmar o‘yini” seriali 2021-yilning sentabr oyida namoyish etildi. Sujet quyidagicha: 456 nafar moliyaviy muammoga duch kelganlar ko‘p millionli sovrin yutib olish umidida sirli o‘yinda ishtirok etadi. Ammo bolalar o‘yiniga o‘xshab ko‘ringan sinovlar halokatli bo‘lib chiqadi: har kuni eng kuchsiz o‘yinchilar tashkilotchilar tomonidan ayovsiz tarzda o‘ldiriladi. Ushbu drama bir zumda tomoshabinlar va tanqidchilarning minglab hayratlanarli izohlariga sabab bo‘lgan va Netflix’da eng ko‘p tomosha qilingan serial sifatida “Brijertonlar” rekordini yangilagandi.
Izoh (0)