Украинада тинчликка эришиш имкони бор, масала фақат бунинг баҳосида — мамлакат ушбу тинчлик учун қанча ҳудудидан, қанча эркинлик ва демократиясидан воз кечишга тайёрлигида, деди НАТО бош котиби Йенс Столтенберг Хельсинкидаги матбуот анжуманида. Бу ҳақда «РБК» хабар бермоқда.
«Украинада тинчликка эришиш мумкин. Масала шундаки, бунинг баҳоси қанақа бўлади? У тинчлик учун ҳудудининг, мустақиллигининг, эркинлигининг, демократиясининг қанчасини беришга тайёр? Бу эса жуда қийин маънавий дилемма (иккиланиш, тараддуд)», — дея қайд этди у.
Столтенберг таъкидлашича, ҳарбий ҳаракатлар музокаралар столи атрофида тугаши керак ва НАТО Украинага Россия билан музокараларда энг кучли позицияни эгаллашда ёрдам беришга тайёр.
Унинг эслатишича, Шимолий Атлантика альянси Украинадаги низо томонларидан бири эмас. Бироқ, унинг сўзларига кўра, НАТО қаршисида иккита вазифа турибди: Киевни қўллаб-қувватлашда давом этиш ва бу мамлакатдан ташқарида жанговар ҳаракатлар кучайишига йўл қўймаслик.
НАТО бош котиби фикрича, Россия президенти Владимир Путиннинг амбициялари «Украина чегарасидан чиқади». Столтенберг эслатишича, Москва томонидан 2021 йил декабрида АҚШ ва НАТОга тақдим этилган хавфсизлик кафолатлари бўйича таклифларда нафақат Украина, балки альянсга тааллуқли бандлар ҳам бўлган.
«Ушбу талаблар Хелсинки келишувларида қайд этилган Европа хавфсизлиги тартибини тўлиқ қайта кўриб чиқиш билан тенг. Битимларнинг бош тамойилларидан бири ҳар бир халқнинг ўз йўлини ўзи танлаш ҳуқуқи ҳисобланади», — деди Столтенберг.
2021 йил декабрида, Ғарб Россияни Украинага ҳужумларга тайёрланишда айблаётган бир пайтда, Москва Вашингтонга хавфсизлик кафолатлари бўйича таклифлар юборди. Россия НАТОнинг шарққа кангаймаслигини ва унинг таркибига собиқ СССР республикалари, шу жумладан, Украина ва Грузияни қабул қилишдан бош тортишни талаб қилганди.
Январда Россия ушбу масала бўйича АҚШ, НАТО ва ЕХҲТ билан учта раундда музокаралар ўтказди. Бироқ томонлар Россия томони учун асосий бўлган бандлар бўйича битимга кела олмади.
Май охирида Украина президенти офиси раҳбарининг маслаҳатчиси Михаил Подоляк баъзи Ғарб сиёсатчилари Киевга Россия ҳарбий операциясини тўхтатиш учун Москвага ўз ҳудудининг бир қисмини беришни таклиф қилаётганини маълум қилди. У Украина бундай муҳокамаларда қатнашмаслигини таъкидлади.
Украина ташқи ишлар вазири Дмитрий Кулеба ҳам Киев ҳудуднинг бир қисмидан воз кечмаслиги ҳақида айтганди. Киев Москва билан ярашишнинг ёмон томонини кўрмаяпти, лекин бу «Украина ҳудуди озод бўлишига» олиб келиши керак, деди у.
Украина президенти Владимир Зеленский, ўз навбатида, Украина 24 февраль куни Россия ҳарбий операцияси бошланганидан кейин бой берилган ҳудудларини қайтариб олганидан кейин у билан музокараларни бошлашини маълум қилди.
Махсус операция бошланганидан экйин бир ҳафта ўтиб, 2 март куни Россия ҳарбийлари Херсонни эгаллаб олди, 15 мартга келиб эса бутун Херсон вилояти Россия назорати остига ўтди. Кейинроқ Россия Мудофаа вазирлиги Запорожье вилоятининг жануби босиб олинганини маълум қилди.
Изоҳ (0)