Qozog‘iston prezidenti Qosim-Jo‘mart To‘qayev 17-iyun kuni Sankt-Peterburg xalqaro iqtisodiy forumida ishtirok etadi. Bu haqda davlat rahbari matbuot xizmatiga tayanib “Interfaks” xabar berdi.
“17-iyun kuni Qosim-Jo‘mart To‘qayev Vladimir Putinning taklifiga binoan Sankt-Peterburg xalqaro iqtisodiy forumining 25 yillik yubileyida ishtirok etadi”, — deyiladi xabarda.
To‘qayev forum yalpi majlisida nutq so‘zlashi, shuningdek, qator ikki tomonlama uchrashuvlar o‘tkazishi rejalashtirilgan, deya qo‘shimcha qildi matbuot xizmati.
Rossiya prezidenti matbuot kotibi Dmitriy Peskov ham To‘qayevning Rossiyaga tashrifini tasdiqladi. Uning ma’lum qilishicha, nafaqat Qozog‘iston rahbari, balki boshqa xorijiy davlat rahbarlari ham forumga tashrif buyuradi.
“Ha, haqiqatan ham prezident To‘qayev forumda ishtirok etishini ma’lum qildi. Biz qozog‘istonlik do‘stlarimiz, hamkorlarimiz va ittifoqchilarimizdan ushbu ishtirok uchun juda minnatdormiz. Boshqa ishtirokchilarga kelsak, ular ham tadbirda bo‘lishadi”, — dedi Dmitriy Peskov “TASS” muxbiri bilan suhbatda.
Peskov forumda boshqa aynan qaysi yetakchilar ishtirok etishni oshkor qilmadi.
Sankt-Peterburg xalqaro iqtisodiy forumi 15—18-iyun kunlari Sankt-Peterburgda bo‘lib o‘tadi. Shahar gubernatori Aleksandr Beglovning aytishicha, forumda ishtirok etish uchun 69 davlatdan delegatsiyalar ariza topshirgan.
Izoh (0)