Amerikaning Astra Space kompaniyasiga tegishli Rocket 3.3 o‘ta yengil raketasi NASA Tropics missiyasining ikkita meteorologik sun’iy yo‘ldoshini orbitaga olib chiqa olmadi, deb yozadi “RBK”. Bunga parvozdan keyin taxminan 10 daqiqa o‘tgach, ikkinchi pog‘ona dvigateli ishdan chiqishi sabab bo‘ldi.
Rocket 3.3 12-iyun kuni 13:43 da (Toshkent vaqti bilan 22:43 da) Floridadagi Kanaveral burnida joylashgan Kennedi nomidagi kosmik markazning 46-start majmuasidan uchirilgandi. U orbitaga NASA’ning tropik siklonlarni kuzatish uchun mo‘ljallangan oltita sun’iy yo‘ldoshidan ilk ikkitasini olib chiqishi kerak edi.
“Birinchi pog‘onaning parvozi odatdagidek kechdi. Biroq ikkinchi pog‘ona vaqtidan avvalroq o‘chib qoldi, va biz yuklarni orbitaga yetkaza olmadik”, — deyiladi Astra xabarida.
NASA qayd etishicha, muvaffaqiyatsizlikka qaramay, missiya ilmiy vazifalarni ikkita orbita bo‘ylab taqsimlangan to‘rtta sun’iy yo‘ldosh bilan bajaradi. Ularni keyinroq uchirish rejalashtirilmoqda.
Astra raketasi uchta muvaffaqiyatsiz parvozdan keyin 2021-yil noyabrida birinchi marta muvaffaqiyatli uchirilgan edi. 2022-yil fevralida Rocket 3.3 eltuvchi raketasi, texnik muammolar tufayli bir necha marta kechiktirilgan parvozni nihoyat, amalga oshirgan, ammo parvozdan keyin 3,5 daqiqa o‘tib, dvigatelning ikkinchi pog‘onasi bilan aloqa yo‘qolgan edi. Shu tariqa, u NASA missiyasi doirasida uchta ixcham sun’iy yo‘doshni orbitaga chiqara olmagandi.
Astra o‘z raketalarini tejamkor deb baholaydi. Bitta start qiymati 2,5 million dollarni tashkil etadi. Og‘ir sinfdagi Falcon 9 raketasini uchirish 60 million dollardan ziyodga tushadi. Rocket — beshta dvigatelga ega ikki pog‘onali raketa, u 500 kilometrli quyosh-sinxron orbitasiga 150 kilogrammgacha foydali yuk olib chiqa oladi.
Izoh (0)