Ҳиндистоннинг Уттар-Прадеш штати ҳукумати ўтган ҳафта ҳукмрон партия вакилларининг Муҳаммад пайғамбар (с.а.в.)га қаратилган ҳақоратли иборалари оқибатида келиб чиққан тартибсизликларга алоқадорликда айбланаётган бир неча кишининг уйларини бузиб ташлади, деб хабар бермоқда Reuters.
Кашмир минтақасида эса ушбу ибораларнинг бир қанчасини баён қилган ҳукмрон партия собиқ матбуот котибини бошидан жудо қилиш таҳдиди бўлган видеони эълон қилган ўсмир ҳибсга олинди.
Бир қатор туманларда мусулмонлар ва ҳиндуийлар ўртасида, баъзи жойларда эса намойишчилар ва полиция ўртасида тўқнашувлар бўлиб ўтди. Уттар-Прадеш штатида норозилик акциялари бошланганидан буён 300 киши қўлга олинган.
Бундай акциялар Ҳиндистоннинг бошқа штатларида ҳам бўлиб ўтди. Чунончи, Жаркханд штатида полиция нозорилик акцияларини тарқатиб юбориш учун ҳавога ўқ узди: икки киши ҳалок бўлди.
Ҳиндистондаги мусулмон озчилик вакилларининг баъзилари ҳақоратли мулоҳазаларни ҳукмрон партиянинг диний эътиқоддан тортиб ҳижоб тақишгача бўлган турли масалалар бўйича босим ва камситишларга мисол сифатида кўрмоқда.
Дам олиш кунлари Уттар-Прадеш штати бош вазири Йоги Адитянатх тартибсизликларга алоқадорликда айбланаётган одамларнинг ҳар қандай ноқонуний муассасалари ва уйларини бузишни буюрди.
Мусулмонлар орасидаги норозиликлар ва тартибсизликлар «Бхаратия Жаната парти» ҳукмрон партиясининг икки вакили Нупур Шарма ва Навин Кумар Жиндал телемунозаралар чоғида Муҳаммад пайғамбар (с.а.в.) ҳақида ҳақоратли фикрлар билдирганидан кейин бошланди.
Тартибсизликлар фонида Шарма зудлик билан лавозимидан четлатилди ва партиядан чиқарилди. Полиция Шармага нисбатан динлараро душманликни авж олдириш билан боғлиқ моддалар бўйича жиноят иши очди. Айни вақтда у келиб тушаётган таҳдидлардан ҳимоя билан таъминланди. Жиндал ҳам партиядан чиқарилди.
Охир-оқибат Шарма Twitter орқали мусулмонлардан узр сўради ва ҳеч кимнинг ҳис-туйғуларига тегиш ниятида бўлмаганини қайд этди.
Ҳиндистон бош вазири Нарендра Моди оммавий тартибсизликлар юзасидан изоҳ берганича йўқ.
Изоҳ (0)