Rossiyada koronavirus omikron-shtammining yuqumliroq bo‘lgan BA.4 varianti aniqlangani tasdiqlandi, deb yozadi Meduza “Rospotrebnadzor”ning Epidemiologiya markaziy ilmiy-tadqiqot instituti genom tadqiqotlari laboratoriyasi mudiri Kamil Xafizovga tayanib.
COVID-19 yangi variantining ilk namunalari laboratoriyaga may oxirida berilgan edi, dedi Xafizov.
Uning aniqlik kiritishicha, yaqinda chop etilgan tadqiqotlar “virusning BA.4 va BA.5 variantlari omikronning avvalgi shakllariga qaraganda biroz yuqumliroq ekanini” ko‘rsatgan.
Ayni vaqtda Xafizov qayd etishicha, hozir Rossiyada BA.2 varianti va undan tarmoqlanib chiqqan tagvariantlar ustunlik qilmoqda, barcha yangi kasallanish holatlarining qariyb 95 foizi ularning ulushiga to‘g‘ri keladi.
Koronavirus omikron shtammining BA.4 varianti 2022-yil boshida birinchi marta Janubiy Afrika Respublikasida aniqlangan, bahorda u Germaniya, Daniya va Buyuk Britaniya kabi bir qator Yevropa mamlakatlarida tarqalgandi.
Taxminlarga ko‘ra, omikronning ushbu varianti boshqalariga qaraganda sal yuqumliroq, bu avvalo uning immunitetdan yaxshiroq qocha olish, ya’ni kasallanib o‘tgan va emlangan odamlarga yuqish qobiliyati bilan bog‘liqdir.
Izoh (0)