Temur Kapadze: “11 o‘yinchi bo‘lib harakat qilganimizda Iroqni osonroq yutardik”

O‘zbekiston U-23 terma jamoasi bosh murabbiyi Temur Kapadze U-23 Osiyo Kubogi—2022 chorak finali doirasida Iroqqa qarshi kechgan o‘yindan keyin o‘z fikrlari bilan o‘rtoqlashdi.

Erta qizil kartochka o‘yinga qanday ta’sir qilgani haqida

Qizil kartochka kutilmagan holat bo‘ldi. Erta 10 kishi bo‘lib qolganimiz katta qiyinchilik tug‘dirdi. Shunday bo‘lsa ham yigitlar ruhan sinib qolmadi, buning uchun ularga rahmat. Asosiysi, g‘alaba qozondik

Yarim finalda qaysi jamoa tushishini xohlayotgani haqida

Yaponiya ham, Janubiy Koreya ham kuchli. Lekin bu taqdirga bog‘liq. Kim kuchli bo‘lsa, o‘sha bilan to‘qnash kelamiz. Ikkala jamoaga ham omad tilab qolaman.

Arab futbolchilariga qarshi o‘ynash haqida

Bu borada futbolchilarga tushuntirish ishlari olib boriladi. Lekin hammada har xil ruhiyat, psixologiya bor. Ular maydonga jangovar ruhda tushadi. O‘sha vaziyatda darvozabonning o‘zi bizning foydamizga qo‘pollik ishlab olishi mumkin edi. Bu biz uchun katta saboq bo‘ldi.

Ne’matovning keyingi o‘yinda ham tusha olmasligi haqida

U jamoadagi yetakchi futbolchilardan biri. Uning tajribasi kattaligini inobatga olsak, bu biz uchun katta yo‘qotish bo‘ladi. Futbolda jamoada 23 o‘yinchi bo‘ladi. Keyingi uchrashuvda zaxira darvozabonimiz bilan kerakli natijaga erishishga harakat qilamiz.

Qizil kartochkadan keyingi o‘yin haqida

Qizil kartochka sabab 1 kishi kam bo‘lib, qiyin vaziyatga tushib qoldik. Yigitlarga ishonar edim. 11 kishi bo‘lganimizda, bu o‘yinda osonroq g‘alaba qozongan bo‘lar edik. O‘z oldimizga qo‘ygan maqsadimiz sari oxirigacha harakat qildik va haqli g‘alabaga erishdik deb o‘ylayman.

Qo‘shimcha bo‘lim va penaltilar seriyasiga tayyorgarlik ko‘rilgani haqida

Albatta, mashg‘ulotlar davomida penaltilar seriyasini mashq qilgan edik. Bungacha shogirdlarimga har qanday vaziyatga tushib qolishimiz mumkinligi, barchasiga tayyor bo‘lishimiz kerakligi haqida aytib o‘tganman. To‘g‘ri, erta qizil kartochka olganimiz ozroq hayajonga solgan bo‘lsa ham, bunday vaziyatlarga tayyorlangan edik.

TemurKapadze, O‘zbekiston U-23 terma jamoasi bosh murabbiyi