Россияда McDonald’s ўрнини эгаллаган ресторанлар тармоғи — «Вкусно — и точка» иш бошлади

McDonald’s Россияда «Вкусно — и точка» номли бренд билан иш бошлади. Бу ҳақда «Коммерсантъ» хабар бермоқда. 

9 июнь куни янги тез овқатланиш ресторанлари тармоғининг логотипи тақдим этилди.

Бугун, 12 июнь куни дастлабки 15 та ресторан очилди. 13 июнь куни яна 50 та ресторан ўз фаолиятини бошлайди. Компания ҳафтасига 50 тадан 100 тагача савдо нуқталарини очишни режалаштирмоқда.

Маълум бўлишича, логистика ва қадоқлаш билан боғлиқ муаммолар туфайли аввал таниш бўлган барча менюлар энди мавжуд эмас. 

Ресторан менюсидан Big Mac бургерлари ва McFlurry музқаймоқлари олиб ташланган. Янги меню ҳам алкоголсиз бўлади, аммо компания таомларни минтақага қараб мослаштиришни режалаштирган. Ресторанлардан брендга тегишли ҳаволалар олиб ташланади.

Айни пайтга келиб Россиядаги барча McDonald’s франшизалари ўз фаолиятини тўхтатган. Улар янги «Вкусно — и точка» бренди остида иш бошлаши мумкин. 

Москва ва Санкт-Петербург аэропортлари ва вокзалларидаги McDonald’s ресторанлари 2022 йил охиригача ишлашда давом этади. 

McDonald’s тармоғи Украинадаги уруши туфайли 14 март куни Россиядаги фаолиятини тўхтатди. 16 май куни компания Россия бозорини тарк этиб, мамлакатдаги активларини сотаётганини маълум қилди. 

10 июнь куни бинезмен Александр Говорга тегишли компания Россиядаги McDonald’s активларининг эгасига айланди. У илгари Сибирда бир нечта франшизаларни бошқарган. 

Ҳисоб-китобларга кўра, McDonald’s Россияни тарк этиши туфайли 127 млн доллар йўқотган.

Аввалроқ Nike Россиядаги бизнесини тўхтатиши ҳақида хабар берилган эди.