Transport vaziri o‘rinbosari Abdusamat Mo‘minov 10-iyun kuni Vyetnamning favqulodda va muxtor elchisi (qarorgohi Moskva shahrida) Dang Min Kxoy boshchiligidagi delegatsiya vakillari bilan uchrashuv o‘tkazdi. Bu haqda Transport vazirligi xabar qildi.
Qayd etilishicha, uchrashuvda mamlakatlar o‘rtasida savdo iqtisodiy aloqalarni rivojlantirish, turizm sohasidagi o‘zaro manfaatli hamkorlikni yangi bosqichga olib chiqish bilan bog‘liq jihatlar muhokama etilgan. Xususan, turizmni rivojlantirish, yo‘lovchi va yuk tashuvlari hajmini oshirish maqsadida ikki davlat poytaxtlarini bog‘lovchi to‘g‘ridan-to‘g‘ri aviaqatnovlarni qayta tiklash bilan bog‘liq masalalar atroflicha ko‘rib chiqilgan.
Uchrashuvda Vietnam Airlines aviakompaniyasi Uzbekistan Airways va Uzbekistan Airports bilan to‘g‘ridan-to‘g‘ri hamkorlikni yo‘lga qo‘ygan holda Xanoy—Toshkent—Xanoy yo‘nalishida muntazam qatnovlarni tashkil etish bilan bog‘liq masalani tez orada batafsil muhokama etishga kelishib olingan.
Izoh (0)