Ukraina prezidenti Vladimir Zelenskiy 9-iyun kuni kechqurun fransiyalik hamkasbi Emmanuel Makron bilan telefon orqali muloqot qildi. Makron Kiyevga qurol-yarog‘, jumladan, og‘ir qurollar yetkazib berish hajmini oshirishga tayyorligini ma’lum qildi. Bu haqda Yelisey saroyi matbuot xizmati xabar berdi.
“Europe 1” radiostansiyasining ma’lumotlariga ko‘ra, Fransiya iyun oyi oxirigacha Ukrainaga yana oltita CAESAR rusumli 155 millimetrli o‘ziyurar artilleriya moslamalarini topshirish haqida e’lon qilishi mumkin. Ukraina armiyasi aprel oyida CAESAR’ning dastlabki oltita qurilmasini olgan edi.
Xabarga ko‘ra, Makronning o‘zi ham yaqin haftalarda Kiyevga tashrif buyurishi hamda safar davomida yangi ta’minotlar haqida e’lon qilishi mumkin.
G‘arb davlatlari Rossiyaning 24-fevralda boshlagan bosqini fonida Ukrainaga qurol yetkazib berish hajmini oshirdi. Fransiya Tashqi ishlar vazirligi jangovar harakatlar bir necha yil davom etishini istisno qilmagan. Emmanuel Makron Vladimir Putinga bir necha bor qo‘ng‘iroq qilgan, ular jami 100 soat gaplashgan. Suhbatlardan birida Rossiya prezidenti Ukrainaga qurol yetkazib berishni to‘xtatishga chaqirgan.
Izoh (0)