Erdo‘g‘on prezidentlik uchun yana nomzodini qo‘ymoqchi

Turkiya prezidenti Rajab Toyyib Erdo‘g‘on bo‘lajak prezidentlik saylovlarida yana o‘z nomzodini qo‘yishini ma’lum qildi.

Erdo‘g‘on davlat rahbari lavozimi uchun Xalq alyansi partiyasidan davogarlik qilayotganini tasdiqladi.

“Xalq alyansining prezidentlikka nomzodi Rajab Toyyib Erdo‘g‘ondir”, — dedi u hukmron Adolat va taraqqiyot partiyasining Izmirdagi mitingida.

Uning qo‘shimcha qilishicha, Turkiyada navbatdagi umummilliy saylovlar o‘z vaqtida — 2023-yilning iyun oyi o‘rtalarida bo‘lib o‘tadi va bu muddatidan oldingi saylovlar haqida barcha shubhalarga chek qo‘yadi.

Qayd etilishicha, muxolifatdagi Respublika Xalq partiyasi – parlamentdagi ikkinchi yirik partiya hozircha prezidentlikka o‘z nomzodini ko‘rsatmagan. Shu sababli Erdo‘g‘on partiya yetakchisi Kamol Qilijdaro‘g‘liga murojaat qilib, nomzodni aniqlashni so‘radi.

2023-yilning iyun oyida Turkiyada umummilliy saylovlar bo‘lib o‘tadi, unda saylovchilar prezidentni, shuningdek, barcha 600 nafar parlament a’zosini saylaydi.

Erdo‘g‘on ilk bor 2014-yilda prezident bo‘lgan. 2018-yilda u ikkinchi muddatga qayta saylangan. Respublika Konstitutsiyasiga ko‘ra, bir shaxs ketma-ket ikki martadan ko‘p bo‘lmagan davlat rahbari lavozimiga saylanishi mumkin, vakolat muddati besh yil. 2017-yilgi referendumdan so‘ng, asosiy qonunga o‘zgartirishlar kiritildi, bu esa muddatlar sonini tikladi.