Украина президент офиси раҳбарининг маслаҳатчиси Михаил Подолякнинг BBC’га айтишича, урушда ҳар куни 100 нафардан 200 нафаргача украиналик аскар ҳалок бўлмоқда.
Подолякнинг сўзларига кўра, қурбонлар сони бунчалик кўплигига асосий сабаблардан бири Украина ва Россия ҳарбий салоҳияти ўртасидаги нотенгликдир.
Президент офиси вакилининг фикрича, Украинага Ғарб давлатларининг «юзлаб энг кучли артиллерия тизимлари» зарур, шунингдек, Россиянинг ўт очиш кучига тенглашиш ва босиб олинган ҳудудларни озод қилиш учун 300 тагача ракета тизимлари керак.
BBC маълумотларига кўра, Михаил Подолякнинг ҳар куни 100-200 нафаргача аскар ўлаётгани ҳақидаги маълумотлари Украина расмийлари томонидан уруш бошидан бери эълон қилинган кунлик йўқотишларнинг максимал сонидир.
1 июнь куни Украина президенти Владимир Зеленский ҳар куни жанг майдонида 60-100 нафар украиналик аскарлар ҳалок бўлаётгани, 500 га яқин одам яраланаётгани ҳақида айтганди. 9 июнь куни эса Украина мудофаа вазири Олексий Резников Донбассда кунига 100 га яқин одам ҳалок бўлаётганини маълум қилди.
Украина ҳам, Россия ҳам қўшинларининг урушдаги йўқотишлари ҳақида мунтазам равишда хабар бермаяпти. Россия Мудофаа вазирлиги бу маълумотни икки марта, охирги марта 25 март куни эълон қилганди — ўшанда 1351 киши ҳалок бўлгани ва 3825 киши яралангани ҳақида хабар берилган. Апрель ойи ўрталарида эса Владимир Зеленский уруш бошидан бери 2500 дан 3000 гача украиналик ҳарбий хизматчи ҳалок бўлганини, яна 10 мингга яқини яраланганини айтди.
Украинада, Россияда бўлгани каби, ҳарбий ҳаракатлар пайтида ўз армиясининг йўқотишларини ошкор қилиш қонун билан тақиқланган. Украина президент офиси раҳбарининг маслаҳатчиси Алексей Арестовичнинг айтишича, бундай маълумотлар давлат сири ҳисобланади, бу маълумотларнинг ошкор этилиши «душманга унинг ҳаракатлари самарадорлигини баҳолашга ёрдам бериши мумкин».
Изоҳ (0)