Toshkentda IIB xodimlari yoshlarni urgani va tahqirlagani aytilmoqda

Ijtimoiy tarmoqlarda Toshkentda ichki ishlar organi xodimlari bir guruh yoshlarni urgani va jinsiy tahqirlagani aytilgan xabarlar tarqaldi. Bu haqda “Nemolchi.uz” loyihasi ma’lum qildi.

Jabrlangan yoshlarning so‘zlariga ko‘ra, ular uylarining yaqinida o‘tirganida hujjatlarni tekshirish uchun ichki ishlar xodimlari murojaat qilgan. Hujjatlar taqdim etilib, tekshirilgan bo‘lsa-da, xodimlar baribir ularni IIBga olib borishlarini aytgan. Qiz hech qayoqqa bormasligini, bunga sabab yo‘qligini bildirgan, lekin xodimlar ularning qo‘llarini qayirib, mashinaga solib olib ketgan. Qiz telefonga yozib olayotganda telefonini olib qo‘ygan va hamma narsani o‘chirib tashlagan. Ular Mirzo Ulug‘bek tumani IIBga olib kelingan, bazada tekshirilgan va qonunbuzarlik holatlari bo‘lmagani uchun qo‘yib yuborilgan.

Shundan so‘ng, ikki nafar IIB xodimi ularni qo‘yib yubormay, telefonlarini olib, qayergadir olib ketmoqchi bo‘lgan. Qiz yana rad javobini berib, uyiga borishini aytgan. Bunga javoban xodimlardan biri uning qo‘lidan ushlab, sudrab mashinaga olib borgan va bor kuchi bilan yuziga musht tushirgan va burnini sindirgan. Yigit qizni himoya qilaman desa uni bog‘lab, qo‘liga kishan solgani, bir necha marta urgan, shuningdek, uni ham mashinaga solishgan.

Yo‘lda qiz qayerga olib ketishayotganini so‘rgan, lekin xodimlar miyig‘ida kulib, jinsiy zo‘ravonlik bilan tahdid qilgan. Yigit uning tarafini olaman, desa uni mashinada dubinka bilan kaltaklay boshlashgan. Qiz qo‘rquvdan qocha boshlagan, biroq xodimlardan biri uning orqasidan yetib olgan va uning ko‘kragi va oshqozoniga tepgan, so‘ng uni mashinaga qamab qo‘ygan.

Ertasi kuni qizning yaqinlari bo‘limga borishgan va IIB xodimlari ustidan ariza yozib bergan. Toshkent shahar IIBB “Nemolchi.uz” so‘roviga javoban xizmat tekshiruvi tayinlanganini aytgan.

Bosh prokuratura matbuot kotibiga ko‘ra, ayni vaqtda holat bo‘yicha Mirzo Ulug‘bek prokuraturasi tomonidan tergovga qadar tekshiruv harakatlari o‘tkazilmoqda.